Hopi interes pa ròndu nobo di supsidio ‘Kansen voor alle kinderen’
Representantenan di aproksimadamente 12 organisashon sosial a presensiá e enkuentro informativo di ‘Kansen voor alle Kinderen’.
Organisashonnan sosial den Hulanda Karibense por entregá nan plannan pa e areglo di supsidio di ‘Kansen voor alle Kinderen’ atrobe entre 29 di aprel te ku 13 di mei. Esaki ta e di tres aña ku por apliká pa e supsidio aki.
E enkuentro a tuma lugá na Courtyard by Marriott na Boneiru. Esnan presente a risibí entre otro splikashon tokante kon por apliká pa e supsidio, pa kiko e areglo di supsidio ta destiná i kiko ta involukrá pa loke ta trata e hustifikashon. E skema di supsidio ta destiná pa suministro konkreto na kos, pa asina muchanan por partisipá sosialmente, riba tereno di kultura, deporte i skol. Ta trata por ehèmpel di ofresementu di kuminda saludabel òf aktividatnan despues di skol pa muchanan ku nan mayor mes no por paga pa esaki.
Ken ta bini na remarke?
Organisashonnan ku bon plan pa yuda mucha, por pidi supsidio. Ta trata di organisashonnan sin meta pa hasi ganashi, ku personalidat hurídiko, manera skol, fundashon, misa i asosiashon. Ta evaluá e plannan den órden di entrada. Si aprobá un plan, e organisashon por risibí supsidio. Na total tin € 1.000.000 disponibel: € 550.000 pa Boneiru, € 250.000 pa Sint Eustatius i € 200.000 pa Saba.
Den e último dos añanan, skol i fundashonnan a risibí sèn pa yuda muchanan di famia ku tin ménos rekurso, ku desayuno eskolar saludabel, dor di paga lès di landamentu òf dor di duna nan e oportunidat pa hasi deporte òf hasi algu ku músika. Aña pasá a aprobá diesnuebe proyekto na Boneiru. Saba por a ehekutá ocho proyekto i na Statia nuebe proyekto por a sigui.
Saba i Sint Eustatius
Na Saba i Sint Eustatius a bishitá praktikamente tur organisashon ku ta risibí supsidio. Ku nan a papia tokante progreso di e proyektonan andando i kon pa yuda nan ku dunamentu di kuenta pa e supsidio. Tambe a duna informashon tokante e periodo di tempu ku ta habri riba 29 di aprel. Na Boneiru a tene un enkuentro di informashon pa tur organisashon pa motibu di e kantidat grandi di proyekto ku ya ta risibí supsidio via ‘Kansen voor alle Kinderen’.
Futuro di e areglo
E periodo di tempu ku ta habri 29 di aprel 2019, ta e último temporada ku ta habri pa e proyekto aki. Entrante 2020 e areglo di supsidio ‘Kansen voor alle Kinderen’ lo kai bou di e programa BES(t) 4 Kids. E programa aki ta dirigí riba mehorashon di kalidat i aksesibilidat (finansiero) di akohida di mucha (pre- i póseskolar) na Hulanda Karibense. Ku esaki, medionan finansiero ta keda strukturalmente disponibel pa muchanan ku ta lanta den Hulanda Karibense.
Si bo tin pregunta tokante ‘Kansen voor alle Kinderen’, bo por manda un e-mail pa kansenvoorallekinderenCN@minszw.nl.