47 Petishon entregá na Schadefonds CN

Entrante promé di aprel 2019, víktima di delito di violensia ku a tuma lugá na Boneiru, Sint Eustatius òf Saba, ta bini na remarke pa un pago di un solo biá di ‘Schadefonds Geweldsmisdrijven’. For di introdukshon di e fondo na Hulanda Karibense, a drenta 47 petishon pa supsidio.

Schadefonds

Aplikashonnan ku ta kumpli ku e kondishonnan i ku a tuma lugá riba òf despues di promé di yanüari 2017, ta bini na remarke pa un kontribushon finansiero.

Di e 47 petishonnan entregá, entretantu a kaba di trata 14. Di esakinan, a otorgá 11 i a rechasá 3. E otro kasonan ta andando ainda. Den tratamentu di e kasonan, Schadefonds ta determiná si ta probabel ku e petishonario (òf su miembro di famia di promé grado), tabata víktima di un krímen violento kometé intenshonalmente. No ta nesesario pa e outor di e krímen ta konosí òf kondená. E pago ta un símbolo di rekonosementu pa e inhustisia ku a hasi e víktima. E benefisio tin un karakter ouksiliar i no tin komo meta pa kubri tur daño a resultado di e krímen. Monique de Groot, direktor di Schadefonds, ta satisfecho ku e resultadonan aki: ‘Mi ta kontentu di por duna un aporte na e restorashon di konfiansa di e víktimanan di krímen violento na Hulanda Karibense. Mi ta spera ku mas i mas víktima sa kon pa haña nos.’

Banda di e areglo regular, Schadefonds tin tambe un supsidio di un solo biá pa medidanan preventivo di seguridat. E ‘subsidieregeling overvallen’ (areglo supsidio pa medida kontra atrako) ta pa persona òf kompania ku ta víktima di atrako kaminda a usa violensia òf ku a menasá ku violensia. Por entregá petishon pa atrakonan kometé despues di promé di yanüari 2019, e areglo ta bálido te 2022. 

Pa mas informashon tokante Schadefonds Hulanda Karibense, por tira un bista riba www.schadefondsCN.com. Awor por mira tambe un video tokante proseso di aplikashon. 

Bo ke apliká? Bishita e kolaboradó nan di Bureau Slachtofferhulp. Nan lo yudá bo gustosamente.