Preisnan na Boneiru 1.2 porshento mas haltu
Den e di tres kuartal di 2019 e preisnan di konsumidó na Boneiru tabata 1.2 porshento mas haltu ku un aña anterior. Na Sint Eustatius e preisnan riba base anual tabata 0.7 porshento mas haltu, na Saba 0.3 porshento. Esaki CBS ta raportá a base di e índise di preis di konsumidó.
Na Boneiru e subida di preis kompará ku un aña anterior tabata kousá pa e desaroyo di preis di paña di bisti i sapatu, komestibel i transpòrt. Paña di bisti i sapatu tabata 6.6 porshento mas karu ku un aña promé i kuminda tabata 4.2 porshento mas karu. E preisnan pa bèrdura i fruta fresku no a kambia hopi último kuartal, pero ketu bai tabata respektivamente 33.4 porshento i 15.6 porshento mas haltu kompará ku un aña promé. Gasolin tabata 4.1 porshento mas karu i diesel 5.0 porshento.
Preisnan di konsumidó na Sint Eustatius 0.7 porshento mas haltu
E preisnan di konsumidó na Sint Eustatius tabata 0.7 porshento mas haltu den e di tres kuartal kompará ku un aña anterior. E oumento di mas grandi a bini di paña di bisti ku tabata 11.1 porshento mas karu i sapatu ku tabata 22.5 porshento mas karu kompará ku un aña anterior. Koriente den e di tres kuartal a subi ku 2.5 porshento pa motibu di un subida di e tarifa variabel. Pero riba base anual e preis di koriente a baha ku 1.7 porshento loke tabatin un efekto pa baha e preisnan di konsumidó.
Preisnan na Saba kasi stabil
Den e di tres kuartal e preisnan di bienes i servisio na Saba tabata un promedio di 0.3 porshento mas haltu ku un aña anterior. Paña di bisti, bèrdura i fruta fresku a subi den preis. E preisnan di bèrdura i fruta tabata 28.5 porshento i 9.4 porshento mas haltu kompará ku un aña anterior. Gasolin tabata 6.0 porshento mas karu, koriente tabata 13.7 porshento mas barata.
Sifra provishonal
E sifranan di e di tres kuartal di 2019 por lo pronto ta provishonal i lo stipulá nan definitivamente den e publikashon tokante di e di kuater kuartal di 2019.