A inisiá areglo temporal di supsidio pa medida kontra atrako
Riba promé di yüli Schadefonds Geweldsmisdrijven ta start ku un areglo di supsidio temporal pa kubri gastu di medidanan preventivo pa minimalisá chèns riba atrako na kas òf negoshi. Schadefonds ta ofresé e supsidio aki na nòmber di Ministerio di Hustisia i Seguridat (JenV).
For di investigashon a resultá ku personanan òf negoshi atraká, ku despues di e insidente no tuma medida preventivo (adishonal), tin chèns mas grandi pa eksperensiá mas atrako. Pa hasi e chèns aki mas chikí, e ministerio ta pone un supsidio di maksimal €1000 disponibel pa por tuma medidanan preventivo, manera instalá iluminashon pafó, kámara di supervishon, òf pa organisá entrenamentu kontra atrako pa personal. Pa bini na remarke pa un supsidio, personanan òf negoshinan mester kumpli ku algun kondishon. E areglo ta konta por ehèmpel solamente si durante e atrako a usa violensia òf si a menasá di usa violensia. Por entregá petishon pa atrakonan kometé despues di promé di yanüari 2019; e areglo ta bálido te 2022. Pa mas informashon tokante e kondishonnan òf tokante entrega di petishon, tira un bista riba www.schadefondscn.com.
Riba promé di aprel 2019 Schadefonds Geweldsmisdrijven a introdusí e areglo prinsipal na Hulanda Karibense. Schadefonds Geweldsmisdrijven ta duna un pago di un solo bia na víktima di delitonan violento ku a sufri leshon síkiko òf físiko. Esaki ta konta tambe pa próhimo di víktima i pariente di defuntu di krímen violento. For di dia a introdusí Schadefonds na Hulanda Karibense, a entregá 25 petishon: 18 for di Boneiru, 2 for di Sint Eustatius i 1 for di Saba. Riba algun di nan a tuma desishon kaba. Ku e supsidio Schadefonds ta rekonosé, na nòmber di komunidat, e inhustisia ku nan a pasa aden. Asina Schadefonds ta kontribuí na rekuperashon di konfiansa i ta satisfasé e sentido di hustisia na víktima i nan próhimo.