Poblashon di Hulanda Karibense mas grandi i ta envehesé den 2030
E poblashon di e tres islanan di Hulanda Karibense ta sigui krese segun espektativa di 25 mil na e momentunan aki pa 30 mil den 2030. Partikularmente e kantidat di habitantenan di edat avansá lo oumentá. Esaki ta resultá for di e pronóstiko di poblashon pa Hulanda Karibense di CBS.
E pronóstiko di poblashon ta deskribí e futuro desaroyo di e poblashon ku ta mas probabel. Pa esaki CBS ta hasi uso di un modelo di simulashon. Suposishonnan basá riba investigashon sientífiko tokante índisenan di nasementu, migrashon i espektativa di bida ta sirbi komo base.
Sinembargo, en partikular e desaroyo di migrashon ta difísil pa pronostiká. Si te 2030 un kuart ménos migrante ku a premirá, establesé nan mes na Hulanda Karibense, e kantidat di habitante lo oumentá na solamente 28 mil. Si un kuart mas establesé nan mes e ta sigui oumentá te 33 mil. E artíkulo di informashon adishonal ta profundisá mas den e métodonan ku a usa, i e desaroyonan ku ta spera te 2050.
Poblashon na Boneiru ta krese mas fuerte
Desde ku e islanan Boneiru, Saba i Sint Eustatius na 10 di òktober 2010 a bira munisipionan hulandes speshal, nan kantidat di habitante a oumentá di 21 mil pa 25 mil. E kresementu kasi den su totalidat tabata na Boneiru, e isla di mas grandi. E poblashon di Sint Eustatius a baha di 3,6 mil na 3,1 mil persona, esun di Saba a krese un tiki di 1,8 mil pa 1,9 mil habitante.
Segun pronóstiko e kantidat di habitante di tur e tres islanan lo oumentá e añanan benidero. Pa Boneiru, ta premirá den 2030 un kantidat di habitante di alrededor di 25 mil, pa Sint Eustatius di 3,4 mil i pa Saba apénas 2,3 mil. Na komienso di 2011, 74 porshento di e habitantenan di Hulanda Karibense tabata biba na Boneiru. Na 2030 esei ta subi segun espektativa te 81 porshento.
Kresementu di poblashon prinsipalmente pa motibu di migrashon
Migrashon for di eksterior ta aportá mas na e kresementu di poblashon na Hulanda Karibense ku kresementu natural (e saldo di nasementu i fayesimentu). Desde 2011, pa aña mas di 1,9 mil inmigrante a bin e islanan, entre nan mas di 5 shen for di Hulanda Oropeo. Pa aña apénas 1,6 mil inmigrante a sali. Nasementu desde 2011 a superá 2 shen pa aña i e fayesimentu a superá shen.
E pronóstiko ta premirá ku te 2030 lo nase un poko mas mucha, pero tambe ku mas hende lo fayesé, i ku un poko ménos inmigrante lo sali. Nèto e saldo di migrashon i kresementu natural lo ta igual na e periodo desde 2011 segun ekspektativa.
E poblashon ta envehesé riba e islanan
Hulanda Karibense tin, kompará ku Hulanda Oropeo, tiki persona di edat avansá. Na 2019 apénas 13 porshento di e habitantenan tin 65 aña òf mas, na Hulanda Oropeo esei ta 19 porshento. Desde 2011, e kantidat di persona di edat avansá a oumentá i e desaroyo aki ta kontinuá segun espektativa.
E pronóstiko ta premirá ku den 2030, 20 porshento di e habitantenan lo ta personanan riba 65 aña. Hulanda Karibense tin proporshonalmente mas òf ménos mes tantu habitante menor di edat ku Hulanda Oropeo. Segun espektativa, den 2030 nan kantidat lo ta mas òf ménos igual ku e ta na e momentunan aki.
Mas hulandes oropeo riba e islanan
Desde komienso di 2011 e kantidat di habitante di Hulanda Karibense nasé na Hulanda Oropeo a oumentá di 1,9 mil na 3,3 mil. E pronóstiko ta premirá mas oumentu te 4,6 mil persona den 2030. Inmigrantenan for di Hulanda Oropeo klaramente tin un preferensia pa Boneiru: 9 di kada 10 ta establesé nan mes aya. Pa inmigrantenan pafó di Hulanda Oropeo i Karibense esei ta 6 di kada 10.