Prome kaso di kontagio na Boneiru – no tin “lockdown”
Den e temporada tras di lomba aki mi a dirigí mi mes na vários okashon na boso pa pidi pa keda kalmu, pa solidaridat i sosten pa otro. Awe mi ke pidi boso esaki atrobe. Boneiru a drenta den un fase nobo. I un fase masha pekuliar. Mi tin ku informá boso ku nos tin e promé persona ku a tèst positivo pa e vírùs di corona. A tuma nota ku e vírùs ta na Boneiru pero na mes momentu mi tin ku agregá algun punto importante aserka.
E resultado di persona ku a tèst positivo ta un konklushon ku ekspertonan riba konseho di RIVM a yega na dje. Pasobra a tèst e persona kuestion vários biaha. Kada bes e tèst a bini bek ku un resultado ku no tabata ni negativo ni positivo. Esta e resultado tabata kada bes inkonkluso.
A base di e promé resultado inkonkluso e departamentu di Salubridat públiko a hasi mes ora un investigashon na e fuente di unda e vírùs a bini. Por bisa aki ku kasi tur probabilidat ku ta trata di kontakto ku un persona di Aruba. Esaki a tuma lugá algun siman pasá. E persona di Aruba ku tabatin kontakto ku ne tabatin síntomanan leve. Despues di e kontakto e persona a bira malu algun dia despues. E persona riba su mes, komo medida preventivo a keda den kas i a tèst e persona aki pa e vírùs di corona. E persona infektá tabatin masha poko kontakto pa no bisa niun kontakto ku otro personanan. Tòg a tuma kontakto ku e personanan ku ta den su ambiente direkto pa investigá si nan por tin síntoma. E persona ta sinti su mes bon i ta rekuperando. E investigashon di ku ken e persona aki tabatin kontakto, huntu ku tur e otro medidanan konosí ku a tuma ta duna nos speransa ku e vírùs no ta sigui plama. E drive Thru di COVID ku nos a inisiá ta yuda nos den investigashon di e situashon aktual.
Pues, a haña e vírùs pues na Boneiru.
Ta trata aki ku kasi tur probabilidat di un kaso importá i ku a kontagiá un otro. Despues di investigashon ekspertonan di salubridat públiko sa unda e fuente di e vírus di corona den e kaso aki ta. Promé ku nos tabatin nos promé e kaso positivo na Boneiru, nos a tuma medidanan di forma preventivo ku ya ta konosí.
Dor ku tin un bon bista di e fuente di vírùs den e kaso aki i tin un bon bista di e kontaktonan ku e persona tabatin, no mester bai over na un lock-down. Tampoko e situashon aki no tin konsekuensia pa e promé vuelo di repatriashon ku ta tuma lugá mayan.
E kos di mas importante ku mi ta pidi kada siudadano pa hasi ta pa sigui tene nan mes na e reglanan stipulá. Tene distansia for di otro pero tambe keda trankil. No bai kore almasená (hamsteren), no tin niun motibu pa hasi esaki.
Boneiru tin hopi resistensia. Nos a pasa kaba den hopi kos huntu. Si nos sigui pone nos skoudernan bou di esaki nos por sigui sòru pa limitá e plamamentu di e vírùs. Huntu ku mi tim mi lo sigui tene boso na altura di e desaroyonan. Mi ta konta ku boso koperashon i konfiansa den otro. Huntu kontra Corona.