7,2 mion euro pa protekshon di koral na Hulanda Karibense
E refnan di koral na Hulanda Karibense (Boneiru, Sint Eustatius i Saba) ta pará bou di preshon. Esei tin konsekuensianan grandi pa e diversidat biológiko, pero tambe pa e prosperidat ekonómiko di e islanan. E gabinete ta hasi 7,2 mion euro disponibel pa para e deterioro i pa rekuperá e ref di koral. Esei Minister Schouten di Agrikultura, Naturalesa i Kalidat di Kuminda (LNV) ta skibi awe, tambe na nòmber di Sekretario di Estado Van Veldhoven di Infrastruktura i Maneho di Awa i di Sekretario di Estado Knops di Asuntunan Interno i Relashonnan di Reino, den un karta pa Tweede Kamer.
E koral na Hulanda Karibense ta menasá dor di eroshon i kontaminashon di awa. E eroshon ta surgi prinsipalmente dor di e mas ku 40.000 kabritunan ku ta kana liber kome e yerbanan (i otro bestia ku ta kome yerba, manera buriku) i e santu di superfisie den laman ku ta daña e koral. Pa kombatí esaki ta bai profeshonalisá kria di kabritu, kaminda ta tene e kabritunan denter di un tranké. Tambe lo evitá hawa- i spulamentu ku awa sushi. Esaki aktualmente ta basha bai laman demasiado bia ku nutriente – manera fòsfat i nitrato. Dor di esaki lima ta krese fuertemente i despues esakinan ta tapa e koral.
Na mes momentu tin un desaroyo yen di speransa pa e koral. Investigashon resien ta mustra ku ta posibel pa planta i laga koral kachu di eland i kachu di biná krese, dos espesie importante pa e ambiente di bida di diferente famia di piská. Lo amplia e investigashon aki na gran eskala.
E protekshon di e koral ta un di e partinan for di e plan di maneho di Naturalesa i Medio ambiente Hulanda Karibense ku a prepará huntu ku e islanan i ku ta konta pa e 10 añanan benidero. Tambe tin atenshon pa protekshon di áreanan di naturalesa i espesienan di animal i e uso duradero di tera i awa. Peska i agrikultura duradero por kontribuí na mehorashon di protekshon di naturalesa i prosperidat ekonómiko den Hulanda Karibense. P’esei e aña aki lo bini ku un plan pa regla piskamentu lokal di tal forma ku na 2030 e nivelnan di piska ta keda stabil. Tambe ta traha riba formanan di agrikultura mas duradero manera un kunuku hidropóniko na Saba (kaminda entre otro tin mester di ménos awa pa produsí kuminda).
Na 2017 Wageningen University & Research (WUR) a publiká e rapòrt ‘Estado di naturalesa di Hulanda Karibense’. Den e último rapòrt di e Konvenshon riba Diversidat Biológiko (‘Convention on Biological Diversity’, CBD) tambe a tira un bista riba e metanan di diversidat biológiko den Karibe. E konklushonnan di ámbos rapòrt tabata kla: akshon adishonal ta nesesario. Ku e plan di maneho di Naturalesa i Medio ambiente Hulanda Karibense 2020 – 2030 ta duna kontenido na esei. No solamente e naturalesa ta yudá ku esei. Turismo di naturalesa i peska ta produsí anualmente mas o ménos 150 mion euro pa e islanan, un parti konsiderabel di e produkto nashonal bruto (‘bruto binnenlands product’, bbp).