Medidanan koronakrísis ta afektá mucha vulnerabel fuertemente

Muchanan ku ta vulnerabel ta pasando momentunan èkstra difísil durante e koronakrísis aki i e medidanan tumá rònt di  “distansiamentu sosial”. E riesgo ta eksistí ku nan por eksperensiá mas violensia doméstiko i abusu di mucha. Pesei Kuido pa Hóben i Bienestar di Famia Hulanda Karibense (JGCN) ke hasi un yamada na tur hende pa yuda tira bista riba e grupo di mucha vulnerabel aki.

kwetsbare kinderen

For di 19 di mart tur skol , akohida pa mucha i klup di deporte ta será. Pa e muchanan ku ta den un situashon insigur na kas, nèt e sitionan aki ta di gran importansia. Ta sitionan ‘seif’ kaminda nan por ta mucha i liber for di e tenshon na kas. Awor ku e sitionan aki a sera, e muchanan vulnerabel aki por sali for di bista. Esaki nos tin ku prevení huntu.

E periodo aki lo bai bira unu sumamente pisá pa e muchanan aki, ku den un ambiente ‘normal’ di kas ya ta eksperensiá violensia i abuso na kas. E chèns ta grandi ku komo konsekuensia di e medidanan  di e koronakrísis, por surgi strès adishonal den e famia i e riesgo pa violensia doméstiko i abusu di mucha ta oumentá.

JGCN ta hasi un yamada na tur hende pa yuda tira bista riba e grupo di mucha vulnerabel aki.

Kiko bo por hasi

  • Tira bista riba e muchanan vulnerabel i famianan den bo serkania.
  • Brinda yudansa dor di yama of manda un whatsApp.
  • Mustra interes i puntra personanan den bo bario si nan mester di sosten.

Dunando bo atenshon i yudansa na famianan ku tin’e difisil, bo ta yuda baha e riesgo di violensia doméstiko i abuso di mucha.

Ki ora tin ku tuma kontakto ku JGCN?

Bo ta preokupá pa un mucha den bo bisendario òf bo a ripará ku den bo mes famia er situashon ta birnado menos seif? Bèl òf meil JGCN, nos lo kuminsá e yudansa nesesario pa yuda bo.

Boneiru:
T
+(599)715 7201 
E: info.jgcn@jeugdzorgcn.com   

Saba:
T
+ (599)790 0479
E: info.jgcn@jeugdzorgcn.com

Sint Eustatius:
T
+(599) 318 3104/3105
E: info.jgcn@jeugdzorgcn.com      

Pa mas informashon