Simposio ‘Hulandes komo idioma strañero’
Dia 24 di novèmber Taalunie ta organisá e simposio ‘online’, ‘Hulandes komo idioma strañero’ den kolaborashon ku partnernan den enseñansa na Kòrsou, Aruba, Boneiru, Sint Maarten, Sint Eustatius i Saba. E simposio ta pa tur hende ku ta envolví den enseñansa Hulandes riba e islanan aki, pues pa dosente i otro profeshonal di enseñansa, mayor i alumno. Meta di e evento aki ta pa laga e partidonan pensa i diskutí konhunto tokante posishon di e idiomanan, espesialmente Hulandes, den enseñansa riba e islanan multilingual aki.
Riba e islanan den área di Karibe kasi tur hende ta papia i komprondé mas ku un idioma, inkluyendo Hulandes. Pero pa hopi hende e no ta idioma materno, sino un idioma strañero. Na tur skol Hulandes ta un materia obligatorio. Na hopi skol, prinsipalmente na e Islanan Kòrsou, Aruba i Bonaire, e ta asta e idioma di instrukshon. E manera di atendé ku Hulandes, hopi biaha ainda ta e sistema tradishonal (di idioma materno). Hopi biaha esaki no ta kuadra ku loke e alumno mester. P’esei mas i mas skol ta pasa ofer pa atendé ku Hulandes komo idioma strañero (NVT), un aserkamentu komparabel ku esun pa e otro idiomanan ku ta siña na skol.
Programa simposio
E evento ta kuminsá 3 or di atardi ku e tayer ‘NVT in mijn klas’ (NVT den mi klas). E tayer aki ta pa dosente, mènedjer di enseñansa i desaroyadó di kuríkulo. Di 4 or pa 6 or di atardi ta sigui un seshon públiko (bilingwe). Pa esaki tur hende ku ta enbolbí den enseñansa di Hulandes ta bonbiní, di dosente i otro profeshonal di enseñansa te alumno, mayor i otronan konserní. E enfoke di e simposio ta Hulandes komo idioma strañero den un ambiente multilingual. Oradó prinsipal ta sr. Jim Cummins, profesor na ‘Ontario Institute for Studies in Education’, ken lo papia tokante e tema ‘Mother tongue based multilingual education’. Banda di e atenshon pa NTV tin tambe un presentashon di e konsepto di ‘Language Friendly School’ - skolnan ku ta rekonosé i aseptá e ‘background’ kultural i multilingual di nan alumno. Pa finalisá lo bai tin oportunidat amplio pa hasi pregunta na un pènel di eksperto den enseñansa di idioma riba e islanan.
NVT netwerk i Kernnetwerk
E Kernnetwerk NVT ta parti di Netwerk NVT. E rueda aki ta konsistí di ‘stakeholder’ di enseñansa di e 5 islanan konserní i tin komo meta pa kompartí konosementu i ‘best practices’ tokante NVT ku otro. E Kernnetwerk NVT ta mas e parti stratégiko di e rueda aki, ku ta empeñá su mes pa renombre mas grandi i un aplikashon mas amplio di e didáktika diNVT den área di Karibe. E aktividatnan ta forma parti di e proyekto Netwerk NVT Carib ku e ministerio di Enseñansa, Kultura i Siensia (OCW) ta sostené finansieramente.
Pa mas informashon i registrashon
Por haña mas informashon riba e página di Facebook NVTCarib. Aki por registrá tambe. Pa e evento aki ta usa e plataforma di ‘video conference’ Zoom. Por mail tambe na: nvtcarib@gmail.com.