‘Formashon Huntu’ a kuminsá na islanan ABC
Ministerio di OCW a pone pa e aña eskolar 2020-2021 un supsidio disponibel di algu mas ku 380.000 dòler pa mehorá formashon di dosente na e islanan ABC. Bou di e denominashon ‘Formashon Huntu’ (‘Samen Opleiden’) lo prepará un promé grupo di studiante.
Serka ‘Formashon Huntu’ ta e institutonan di formashon i direktivanan di skol huntu ta responsabel pa forma futuro dosentenan. Den futuro esaki lo tuma lugá durante gran parti di e estudio na e skolnan di formashon, kaminda studiantenan lo para dilanti di klas pa haña konosementu di práktika i eksperensia. Asina lo prepará studiantenan optimalmente pa e profeshon i pa e konteksto lokal. E konteksto ei ta rekerí un dosente karibense di siglo 21: un dosente ku ta poseé abilidatnan di siglo 21 i tin konosementu di e kultura riku karibense.
Pa duna forma na e koperashon entre e institutonan di formashon i e direktivanan di skol na e tres islanan, a lanta e asosiashon Kibrahacha. Den esaki diferente direktiva di skol di e islanan ABC ta representá. E institutonan di formashon i enseñansa avansá, University of Curaçao, Instituto Pedagogico Arubano, University of Aruba i University of St. Martin tambe ta forma parti di e asosiashon.
‘Formashon Huntu’ ta un di e palabrashonnan di e Konsulta di Kuater Pais (Vierlandenoverleg). Na febrüari di 2019 e ministernan di Kòrsou, Aruba, Sint Maarten i Hulanda a firma un protokòl di koperashon pa reforsá formashon di dosente den e parti karibense di nos Reino.
Mas informashon tokante ‘Samen Opleiden’ por mira den e video-graphic aki.