Opstarttoelage i guia pa studiante ku ta bai studia na Hulanda

Hóbennan di Boneiru, Sint Eustatius i Saba ku ta bai studia na Hulanda Oropeo for di e aña eskolar binidero, por konta ku un Opstarttoelage i guia grátis den e promé aña di estudio.

OCW Opstarttoelage

E Opstarttoelage ta konsistí di un beka di prestashon di un bia di $2,761.72 i fiansa máksimo di $5,523.44 i esaki ta destiná pa yuda paga, por ehèmpel, pasashi, mobilario pa kamber, ‘overbrugging’ i guia na Hulanda.

Studiantenan por risibí guia grátis durante e promé aña via RCN-Studiefinanciering. E guia aki ta konsistí di entre otro, organisá un buelo den grupo pa Hulanda, akohida na Schiphol i un pakete di seguro adishonal pa e studiante ta sigurá na Hulanda. Aparte di esei, studiantenan di Hulanda Karibense ta risibí guia di un mèntòr durante e promé aña. E mèntòr ta yuda ku entre otro inskripshon na e munisipio, hasi petishon pa un ‘Burgerservicenummer’ i habri un kuenta di banko. Ademas di e servisio di guia, studiantenan por hasi uso di e servisio di alohamentu. Esaki ta nifiká ku e supervisor lo hasi tur kos posibel pa haña un alohamentu adekuá pa e studiante na Hulanda.

Registrá promé ku  1 di aprel

E Opstarttoelage ta konta pa studiantenan ku ta sigui un estudio fultaim riba nivel mbo 3 òf 4, hbo òf universidat na Hulanda Oropeo. Un studiante por apliká pa e Opstarttoelage si e ta bin na remarke pa DUO Studiefinanciering tambe. E petishon pa Opstarttoelage inkluí guia, mester ta aden promé ku 1 di aprel. Pa hasi esaki, e studiante por hasi uso di e formulario riba wèpsait di RCN-Studiefinanciering.