Trahando huntu pa dal un stap nobo den Relashonnan di Reino
Mehorá nivel di bida, kuida i protehá naturalesa i medioambiente i traha riba bon enseñansa i un ekonomia mas diversifiká. Eseinan ta tema prinsipal ku Sekretario di Estado Alexandra Van Huffelen ta bai traha ariba e añanan benidero. Den un karta ku el a manda awe pa Tweede Kamer e ta anunsiá ku pa logra esei, koperashon a base di igualdat ta e punto di salida di tur su esfuersonan.
Den e karta e Sekretario di Estado ta deskribí e oportunidat- i retonan pa e parti Karibense di Reino. Di 11 te ku 24 di febrüari el a bishitá e seis islanan. E ta konstatá despues di e bishita ei ku kada un di e islanan tin nan propio nesesidat i ku tin mester pues di un aserkamentu na midí.
“E islanan ta ofresé hopi oportunidat mes, basta e abitantenan haña oportunidat pa probechá di nan”, e Sekretario di Estado ta bisa. “Mi ta mira komo mi enkargo pa duna sosten den esei. Huntu ku gobernante- i abitantenan di e parti Karibense di Reino mi kier bai traha duru pa logra esei. Naturalmente respetando tambe e posishon outónomo den e mesun Reino ei.”
Sekretario di Estado Van Huffelen na promé instante ta preokupá pa e pobresa ku el a mira riba e islanan. “No opstante e esfuersonan di e gabinetenan anterior, mi ta konstatá ku e hendenan na Boneiru, Saba i Sint Eustatius no ta ripará esei sufisientemente den nan pòtmòni.”
Den e akuerdo di gobernashon a palabrá ku strukturalmente tin 30 mion euro disponibel pa Hulanda Karibense, banda di 35 mion euro pa konservashon i restorashon di naturalesa.
Pa loke ta trata e Sekretario di Estado, kooperashon a base di igualdat ta pará sentral den e relashon ku e paisnan Aruba, Kòrsou i Sint Maarten. “Tur tres pais ta parti igual di Reino i esei ta e base riba kua nos ta traha huntu pa futuro.“
Reto ku e paisnan ta enfrentá den esei ta entre entre otro e pobresa kresiente, falta di kapasidat di implementashon i un estado di derecho ku mester di refuerso. “Ta retonan serio pa kua nos mester probechá di e forsa di Reino. E paisnan ta na turno pa traha riba solushon, pero den esei nan no ta nan so pará. Esei ta nifiká tambe ku nos empeño ta pa un gobernashon sano i íntegro, ku ta salbaguardiá derechonan humano.”
Ta intenshon pa huntu ku e isla- i e ministerionan konserní, sigui detayá e plannan den e karta di prioridat di maneho (hoofdlijnenbrief). Kamer ta risibí resultado di esei promé ku verano.