Seguridat no ta opvio: proposishon Strategia di Seguridat di Reino Hulandes
E seguridat den nos Reino no ta opvio. Esaki ta rekerí nos atenshon konstantemente, pa por sòru ku nos ta safe i ta keda safe. Paso sin seguridat, nos no por biba den libertat. Awe minister di Hustisia i Seguridat Yeşilgöz-Zegerius i minister di Asuntunan Eksterior Hoekstra a manda e Strategia di Seguridat di Reino Hulandes (Strategia di Seguridat) pa Parlamento Hulandes. Ku e Strategia di Seguridat pa Reino e base ta ser poné pa un futuro den kua nos lo ta defensivo i prepará pa e peligernan di awe i mañan.
Pa promé biaha tin un strategia di tur e paisnan den Reino i e seguridat eksterno i interno ta ser konektá ku otro pa medio di un plan di maneho. For di un análisis resientemente a resultá ku e urgensia ta haltu: e chèns ku den añanan benidero un suseso ku por toka e seguridat nashonal por tuma lugá; ta relativamente grandi.
“Seguridat ta un tarea esensial di un gobièrnu. Na mes momento seguridat apsoluto no ta eksistí. Peliger no por ser eliminá kompletamente. Esaki ta nifiká ku nos lo hasi un apelashon na e siudadanonan, kompanianan, organisashonnan sosial i otro instanshanan pa tambe tuma medidanan kontra e peliger. Esaki ta tambe un yamada pa ta alertá i prepará. Pa si a kaso algu bai robes inesperá”, segun Yeşilgöz-Zegerius.
“E invashon Rusiano na Ukraina ta demostrá aun mas kla ku nos seguridat Europeo ta na peliger. Nos ta eksperensiando atrobe un guera riba e teritorio Europeo. Pero esaki no ta e úniko peliger. Tambe nos seguridat geopolítiko, ekonómiko i digital ta ser pruebá. Esaki ta eksigí un kontesta koherente, proaktivo i fuerte riba e nivel nashonal i internashonal. Fortifikashon di nos defensa nashonal no ta bai sin e mundu rondó di nos. Fuera di esei mester forma un koalishon internashonal i generá sosten internashonal. Un Reino safe ta eksigí un koperashon fuerte den Europa, den NAVO i mundial”, segun Hoekstra.
Direkshon stratégiko
E strategia di seguridat ta konsistí di tres parti. E promé parti ta konsistí for di e interesnan nashonal di seguridat kual mester ser protehá for di e punto di bista di seguridat nashonal i e desaroyonan mas importante di peliger kontra e seguridat nashonal. E seis interesnan nashonal di seguridat ta: teritorial, físiko, ekonómiko i seguridat ekológiko, sosial i stabilidat polítiko i órden hurídiko internashonal i stabilidat. E paisahe di peliger ta transladá su mes den e direkshon stratégiko den e di dos parti di e strategia, pa medio di tres ophetivo prinsipal i diesdos linea di akshon ku ta konta pa henter Reino.
E tres ophetivonan prinsipal ta: un Reino protehá den un mundu multipolar, un órden hurídiko demokrátiko ku ta defensivo i un sosiedat prepará i elástiko. E terser parti di e strategia ta kontesta e pregunta kon e maneho i repartishon di responsabilidat riba nivel nashonal den Reino ta mustra.
Komunikashon di Riesgo
E strategia di seguridat ta marka e inisio di un fase nobo den e intensifikashon di e komunikashon di riesgo for di gobièrnu, huntu ku entre otro, otro regionnan di seguridat, munisipionan i organisashonnan sosial. For di desèmber 2022 ta pará riba wèpsait denkvooruit.nl kiko gobièrnu ta hasi komo preparashon kontra peliger i krísis i kon siudadanonan i kompanianan por prepará nan mes. Ku e fase nobo aki ta kuminsá un kampaña públiko online ku ta yama hende pa kombersá tokante di e riesgonan i preparashonnan den nan besindario. Ku e esaki e konsientisashon pa ku riesgo den sosiedat lo oumentá.
E strategia di seguridat den Reino Hulandes a ser realisá ku un partisipashon grandi di organisashonnan públiko, privá i sosial den tur parti di Reino, bou di kordinashon di e Kordinadó Nashonal di Kombatimentu di Terorismo i Seguridat (Nationaal Coördinator Terrorismebestrijding en Veiligheid (NCTV)).
Pa mas informashon; https://papiamentu.rijksdienstcn.com/hustisia-i-siguridat/strategia-di-seguridat