Rapòrt ku konseho Mesa di Klima Boneiru entregá

Notisia | 08-05-2023 | 00:00

E partisipantenan na e mesa akí tin ku bai diskutí tokante un aserkamentu ku mester kondusí na un Akuerdo di Klima Boneiru. Tantu entidat públiko Boneiru, komo gabinete ta aseptá e konseho akí. Gabinete ta gradisí señor Nijpels i lo bin ku un reakshon amplio riba e rapòrt ku konseho akí despues di zomer.

Rapòrt ku konseho ‘Nunka no ta muchu lat’

Kwartiermaker Nijpels ta konsehá den su rapòrt ‘Nunka no ta muchu lat’ pa instituí un mesa di klima Boneiru ku ta kondusí na un Akuerdo di Klima Boneiru. E mesa konosé dos meta: hasi palabrashon konkreto pa hasi e isla Boneiru mas sostenibel i hasi palabrashon pa hasi e isla resistí mas i por defendé su mes kontra aktual i futuro konsekuensia di kambio di klima. Mester pone e mesa bou di guia di un presidente independiente i trese representante di e diferente organisashonnan gubernamental i e sektor- i organisashonnan no gubernamental riba e isla, huntu. E Mesa di Klima Boneiru ta kumpli ku kuater funshon: formulá palabrashonnan pa yega na un akuerdo di klima, siñalá falta di konosementu, stimulá diálogo sosial i monitòr progreso. Den sentido mas general Nijpels ta konsehá pa no mira e maneho di klima lòs for di e retonan sosioekonómiko ku Hulanda Karibense tin i pa formulá maneho ku ta koherente ku e konteksto karibense i e enfoke riba maneho pa rekuperashon di naturalesa i planifikashon di espasio.

Motibu di rapòrt ku konseho Mesa di Klima Boneiru

Komo isla chikitu, i ku ta keda abou, Bonaire ta sumamente vulnerabel pa impakto negativo di kambio di klima manera inundashon, yobida pisá òf kalor ku ta dura tempu largu i daño na i pèrdida di ref di koral. Un subida di e nivel di laman lo pèrkurá ku den 2050 e partinan mas abou i partikularmente no habitá di Boneiru, e saliñanan, por inundá. Den 2150 e áreanan konstruí manera kapital Kralendijk i Belnem tambe ta kore riesgo. Ounke ku Hulanda Karibense no tin obligashon legal pa redusí emishon di gasnan ku ta kousa keintamentu global, komo ku e Akuerdo di Klima di Paris i e Lei nashonal di Klima ta konta solamente pa Hulanda Oropeo, Boneiru tin e ambishon pa kontribuí na e lucha kontra kambio di klima. Gabinete ta sostené e ambishon akí di kurason i pa e motibu ei, den konsulta ku entidat públiko Boneiru (OLB), a pidi Ed Nijpels pa eksplorá kon por organisá mihó e mesa di klima Boneiru.

Saba i Sint Eustatius

Na Saba i Sint Eustatius e retonan di inundashon ta mas chikitu ku na Boneiru, pero e kambio di klima ta sòru si pa entre otro un riesgo mas grandi pa tormenta tropikal. No opstante ku riba ámbos isla tin porsentahe signifikativo di elektrisidat produsí di manera sostenibel disponibel i tin plannan hopi avansá pa yega na 90% di energia duradero, tin retonan tambe. Na Sint Eustatius e preokupashon mas grandi ta konsentrá riba energia, awa i eroshon na gran eskala. Pa Saba e enfoke ta partikularmente riba restorashon i konservashon di naturalesa riba tera i laman, mehorashon di e kapasidat pa sòru pa satisfasé propio nesesidat i desaroyo di produkshon sostenibel di kuminda. Mirando e tamaño i naturalesa di e problema di klima i e tamaño limitá di e poblashon na Sint Eustatius i Saba, Nijpels ta konsehá pa laga instituí un Agènda di Klima pa ámbos isla, bou di guia di un eksperto independiente, ku sosten di e ministerionan na Den Haag i den konsulta ku e kolegionan ehekutivo i organisashonnan sosial.

Pasonan siguiente

OLB i gabinete ta aseptá e konseho i tin intenshon eksplísito pa instituí e mesa di klima Boneiru. Na mes momentu un konklushon di e rapòrt ku konseho ta, ku pa un komienso eksitoso ta nesesario pa kumpli promé ku kondishonnan esensial. Pa e motibu ei gabinete ta traha riba un reakshon digno di gabinete ku lo sali despues di zomer. Akiden lo reakshoná riba entre otro kontenido di e presidensia, kapasidat rekerí i sosten i e aserkamentu ku ta proponé pa Saba i Sint Eustatius.