Garantia di Hipotek na Boneiru awor tambe pa kas te ku mas o menos $ 300.000
Mas kumpradó di kas por apliká pa un hipotek ku garantia di hipotek na Boneiru (HGB). For di promé di mei 2024 e montante límite lo subi: for di $ 225.000 pa $ 305.000. Asina HGB ta konektá mihó ku e preisnan di benta di kas na Boneiru. Ku e garantia di hipotek, kumpradó por haña un fiansa pa e montante total di kompra. Pa e motibu aki tin ménos nesesidat pa usa bo mes sèn. Tambe, HGB ta ofresé un ret di siguridat pa kumpradó ku ta haña su mes den difikultat finansiero dor di situashon personal. Ku esaki, HGB ta mehorá akseso na kompra di un kas.
E límite nobo ta konektá mihó ku e preisnan di benta
For di 2021 kumpradó di kas por apliká pa e garantia di hipotek. Tres entidat a hasi esaki posibel: gobièrnu, Nationale Hypotheek Garantie (NHG), i Maduro & Curiel's Bank Boneiru (MCB). Kumpradó por bishitá e wèpsait di Garantia di Hipotek Boneiru pa mira si e garantia ta interesante p’é i si e ta kumpli ku e kondishonnan.
NHG a konstatá ku te ainda a sera masha poko hipotek ku HGB. E motibu pa esaki por ta ku no tin hopi kas ku un preis di benta bou di e límite bieu di $225.000. Pa e motibu aki a subi e límite pa $305.000. Dor di esaki, por apliká pa HGB pa un parti mas grandi di e kasnan disponibel pa kumpra.
Biba na un manera pagabel pa mas hende na Boneiru
E garantia di hipotek ta un programa piloto. E programa piloto aki ta solamente na Boneiru pa motibu ku na komienso di e programa piloto solamente na Boneiru tabatin un banko ku tabata kumpli ku e kondishonnan pa sera un NHG. E banko mester ta bou di supervishon di De Nederlandsche Bank. E garantia di hipotek ta un di e medidanan ku e gabinete ta implementá pa mehorá e abilidat pa paga i disponibilidat di kas den Hulanda Karibense. Despues di sinku aña lo evaluá i lo disidí si ta posibel ainda pa apliká pa garantia di hipotek.
E dil di bibienda (woondeal)
E kolegio ehekutivo di Boneiru huntu ku Hugo de Jonge, minister di Asuntunan Interno, a firmá tambe na 2023 e dil di bibienda pa Boneiru. E meta ta pa realisá mas ku 2100 kas pagabel te ku 2030.
Den e Deal di Bibienda Boneiru ta stipulá ku un kas pagabel ta un kas ku un preis di benta máksimo igual na e límite di HGB. E oumento di e límite di gastu di HGB ta nifiká ku e preis máksimo di un kas pagabel pa kumpra tambe ta subi te ku $305,000.