For di promé di yanüari tin mas opshon pa skohe un fam
Ta importante pa tin un fam; esaki ta bisa algu tokante ken bo ta i na ken bo ta pertenesé. Entrante promé di yanüari 2024 a amplia e opshonnan pa skohe un fam. Mayornan for di e momento ei tambe tin e posibilidat di skohe pa un kombinashon di nan dos famnan komo fam pa nan yu.
Ken por skohe pa un fam kombiná?
E eskoho pa un fam kombiná ta bira posibel pa mucha ku a nase for di promé di yanüari 2024. Durante di e embaraso, na momento di deklarashon di nasementu òf ora di rekonosementu di e yu, mayor huntu por duna nan preferensia pa un fam kombiná na Registro Sivil. E eskoho ta un solo biaha i e lo konta tambe pa tur yu ku ta sigui. E eskoho pa un fam kombiná, no ta nifiká ku e outoridat di mayor ta kambia.
Tin un areglo di transishon tambe
Esei ta nifiká ku mayor di kua tur yu a nase despues di promé di yanüari 2016 por laga adaptá e fam den un fam kombiná. E adaptashon ta posibel solamente pa tur yu huntu.
Den kaso di adopshon tin otro kombinashon posibel
Si e mayornan (adoptivo) pa nan promé yu a skohe pa e fam di un di nan òf pa un kombinashon di esakinan, un siguiente yu adoptivo tambe por haña e nòmber ei. Banda di esei nan por skohe pa e nòmber original di e yu adoptivo. Finalmente nan por kombiná (un parti di) e fam original di e yu adoptivo ku e fam ku a skohe anteriormente di un di nan dos. Diferente yu adoptivo den e famia pues por tin e mésun fam, òf diferente fam.
Ehèmpel di fam kombiná
Riba rijksdienstcn.com tin pregunta i kontesta frekuentemente hasí tokante e eskoho di un fam kombiná. Aki por haña un infographic ku diferente ehèmpel di posibilidat di eskoho.
Pidi fam kombiná na Asuntunan sivil
Por pidi un fam kombiná na departamentu di Asuntunan sivil di e Entidat Públiko. Bo ta alkansá nan via:
Boneiru: +599 715 5330, info@bonairegov.com òf burgerzaken@bonairegov.com
Saba: +599 416 3497, censusmail@sabagov.nl
Sint Eustatius: +599 318 2497, census.office@statiagov.com