Inflashon ta subi na Boneiru i Saba i ta baha na Sint Eustatius
Den e promé kuartal di 2025, produkto i servisio di konsumo na Boneiru tabata 5.5 porshento mas karu ku un aña anterior. Den e di kuater kuartal di 2024, inflashon tabata 1.8 porshento ainda. Asina Ofisina Sentral di estadístika (CBS) ta informá a base di e índise di preis di konsumidó pa Hulanda Karibense.
Na Sint Eustatius, preisnan tabata 2.2 porshento mas haltu riba base anual den e promé kuartal di 2025, mientras ku inflashon tabata 3.4 porshento den e di kuater kuartal di 2024. Inflashon na Saba tabata 4.8 porshento den e promé kuartal di 2025. Un kuartal anterior na esaki, inflashon tabata 3.3 porshento.
Preisnan na Boneiru 3.8 porshento mas haltu kompará ku e kuartal anterior
Preisnan na Boneiru a subi ku 3.8 porshento den e promé kuartal kompará ku e di kuater kuartal di 2024. E oumento aki ta parsialmente kousá pa e gastunan di bibienda, awa i energia. Por ehèmpel, e suministro di awa a bira 47.4 porshento mas karu kompará ku e di kuater kuartal di 2024 debí na un oumento di preis den e tarifa fiho. Preis di koriente tambe a subi ku 22.0 porshento, for di yanüari 2025 no tabatin supsidio mas riba gastunan fiho. Finalmente, preis di paña i sapatu tambe a subi ku 3.9 porshento, prinsipalmente debí na un oumento di preis di paña i sapatu pa hende muhé.
Di otro banda, transporte a bira mas barata den e promé kuartal kompará ku e di kuater kuartal. Por ehèmpel, e preis di gasolin a baha ku 6.7 porshento kompará ku e kuartal anterior, i e preis di diesel ku 7.0 porshento.
Preisnan na Sint Eustatius 0.1 porshento mas abou ku e kuartal anterior
Na Sint Eustatius, preisnan di konsumidó a baha ku 0.1 porshento den e promé kuartal di 2025 kompará ku e di kuater kuartal di 2024. Koriente a bira 3.8 porshento mas barata apesar di e terminashon di e supsidio riba e tarifa fiho for di 1 di yanüari 2025. E kousa di bahada di preis di koriente ta debí na un bahada di preis di e tarifa variabel. Transporte tambe a bira 4.7 porshento mas barata. Esaki ta pa gran parti pasobra ticketnan di avion a bira mas barata.
Awa tabata 34.8 porshento mas karu ku e kuartal anterior. Esaki ta debí na un oumento di preis den e tarifa variabel pa awa di pipa, i tanki di awa tambe a bira mas karu. Preis pa rekreashon i kultura a subi ku 5.4 porshento e kuartal aki, prinsipalmente debí na oumento di preis pa servisio di streaming. Paña i sapatu a subi ku 2.1 porshento den preis, prinsipalmente debí na oumento di preis den paña di hende muhé.
Preisnan na Saba a subi ku 2.1 porshento for di e kuartal anterior
Na Saba, preisnan a subi ku 2.1 porshento den e promé kuartal di 2025 kompará ku e di kuater kuartal di 2024. Koriente tabata 36.0 porshento mas karu ku último kuartal debí na e terminashon di e supsidio riba e tarifa fiho te ku 1 di yanüari 2025. Preis di paña tambe a subi ku 38 porshento kompará ku e di kuater kuartal di 2024. Finalmente, gastunan di kuido di salú tambe a mustra un oumento di preis di 4.4 porshento. Esaki tabata prinsipalmente debí na e tarifanan dental mas haltu.
Di otro banda, preis di edukashon i transporte a baha den e promé kuartal di 2025. Por ehèmpel, preis di gasolin i diesel tur dos a baha ku 4.7 porshento kompará ku e kuartal anterior.
Sifranan preliminar
E sifranan pa e promé kuartal di 2025 ta preliminar i lo finalisá esakinan na momentu di publikashon di e sifranan pa e di dos kuartal di 2025.
A ahustá e sifranan preliminar pa e di kuater kuartal di 2024. Pa Sint Eustatius esaki ta konserní e gruponan di produkto rekreashon i kultura i vários produkto i servisio. Pa Saba, esaki ta regardá e gruponan di produkto bibienda, awa i energia i varios produkto i servisio. A base di informashon risibí posteriormente a hasi e ahustenan aki. Banda di esaki tin kambionan den e índise pa hóreka pa Saba, pa motibu di kambionan ku ta resultá for di e analisis final i prosesamentu di dato.
Fuentenan:
StatLine - Hulanda Karibense https://opendata.cbs.nl/CBS/nl/dataset/84046NED/table?dl=BFA9