Estado di nos klima 2024: Un aña rekòrt di kalor
Kambio di klima ta birando mas i mas notabel, tantu na Hulanda (Karibense) komo rònt mundu. Na Hulanda Karibense, 2024 tabata e aña di mas kalor ku a yega di registrá. Den estado di nos klima, KNMI ta deskribí e wer na aña 2024 i ta pone esaki den konteksto di e kambio di klima rònt mundu. Ta publiká sekshonnan relevante pa Boneiru, Sint Eustatius i separá na hulandes, ingles i papiamentu.
Aña di mas kalor ku a yega di registrá
Hulanda Karibense na 2024 tabata tin un aña ku kalor riba e promedio. E promedio di e temperaturanan na Sint Maarten, Sint Eustatius i Saba tabata 28,4 °C, i na Aruba, Boneiru i Kòrsou 29,1 °C. Esaki a hasi 2024 e aña di mas kalor ku a yega di registrá. E temperatura den Oséano Atlántiko nort tropikal tambe a alkansa un rekòrt haltu atrobena 2024.
Na Hulanda Karibense e rekòrt di kalor a bai kompañá pa relativamente ménos bientu i humedat haltu. E kombinashon di temperaturanan haltu ku tiki bientu i humedat haltu ta pone ku e ta sinti manera un temperatura haltu.
Un temporada di orkan drùk ku un silensio notabel
2024 a konosé un temporada di orkan drùk riba e promedio den e region atlántiko ku diesocho tormenta tropikal, di kua diesun a krese bira orkan. Sinku di e orkannan aki asta a alkansá e kategorianan di mas haltu. Un kousa di e temporada di orkan drùk tabata un kombinashon di awa di oséano hopi kayente i un La Niña den desaroyo, ku a kuminsá den pitu di aña 2024. E temporada di orkan tambe a konosé un silensio notabel: entre medio ougùstùs i medio sèptèmber ningun orkan a desaroyá, siendo ku generalmente e punto kulminante di e temporada di orkan ta kai den e periodo aki.
Dia 2 di yüli orkan Beryl, a bira e promé orkan di mas tempran pa alkansá kategoria 5, ku velosidatnan di bientu di riba 270 kilometer pa ora. Durante su rekorido dor di Laman di Karibe Beryl a kousa hopi destrukshon. Beryl a pasa nort di Boneiru, kaminda a emití un atvertensia pa olanan brutu. Tormenta tropikal Ernesto a pasa serka di Saba i Sint Eustatius dia 13 di ougùstùs. E islanan a keda afektá prinsipalmente pa hopi áwaseru ku a kondusí na inundashon i baranka di piedra ku a kai. I dor di e bientu duru, palunan a kai na e islanan.
Mas tokante e estado di nos klima
Kada aña, KNMI ta publiká e estado di nos klima. E rapòrt aki ta duna un bista general di e wer i e klima na Hulanda i na mundu. A funda KNMI dia 31 di yanüari 1854, i e aña aki e ta kumpli 171 aña di eksistensia. Por haña informashon aktualisá tokante klima riba e página di bista general di klima, den e “dashboard” di klima i den e boletinnan di tempu semanal.
E rapòrt ta publiká riba wèpsait di KNMI i por download direktamente via www.knmi.nl bou di e "tab" “Kennis & Uitleg”.