Na 2024, e promedio di konsumo di awa di bebe pa kas di famia na Boneiru tabata 153 meter kúbiko, pero tin diferensia grandi entre barionan. Kasnan di famia den e barionan di Sabadeco i Lima ta konsumí mas tantu awa di bebe komo promedio. E barionan Rincon-Nòrt i Rincon-Sùit tin e promedio di konsumo mas abou pa kas di famia. Asina CBS ta informá.
E bario di Sabadeco tin e promedio di konsumo di awa di bebe pa kas di famia di mas haltu na Boneiru, ku 469 meter kúbiko na 2024. Esaki ta muchu mas haltu ku den otro barionan. Entrada ta parse di hunga un ròl, mirando ku Sabadeco tin e promedio di entrada disponibel pa gasta mas haltu.
Konsumo di awa tambe ta haltu na Sabadeco pa motibu ku e bario aki tin un kantidat relativamente grandi di pisina, ku ta yená ku awa di bebe. Kasnan den e bario di Lima tambe ta usa un kantidat relativamente grandi di awa di bebe pa kas di famia, ku un promedio di 347 meter kúbiko. Den e barionan di Santa Barbara i Nawati Nòrt, e konsumo di awa di bebe tabata konsiderablemente mas abou, ku 237 meter kúbiko i 223 meter kúbiko.
Konsumo di awa di bebe na Rincon sùit ta esun di mas abou
Den e bario di Rincon Nort i Rincon Sùit, e konsumo di awa di bebe ta mas abou ku na hopi otro parti di e isla. Na Rincon Nort, kasnan di famia ta usa un promedio di 109 meter kúbiko di awa di bebe, i na Rincon Sùit, 106 meter kúbiko.
Imágen: © CBS
Konsumo mas haltu di awa di bebe for di aprel pa òktober
Ta konsumí mas tantu awa di bebe na Boneiru for di aprel pa òktober. Den e periodo aki tin ménos áwaseru i ta un poko mas kayente. E periodo ku ta konsumí ménos awa di bebe ta di novèmber pa mart.
Den barionan manera Lima i prinsipalmente Sabadeco, tin diferensia mas grandi den konsumo pa luna. E otro barionan ta mustra un konsumo di awa basta stabil pa kas di famia durante henter aña, ku solamente un oumento leve durante e lunanan di zomer.
Imágen: © CBS
Kasnan di famia ku un konsumo abou di awa ta paga ménos na 2024
Kasnan di famia a paga un promedio di US$57 pa luna pa awa di bebe na 2024. Den e barionan di Sabadeco i Lima, kasnan di famia a paga US$166 i US$124 pa luna pa awa di bebe.Esaki ta debí na nan konsumo di awa relativamente haltu.
Den e barionan Rincon-Nort i Rincon-Sùit, kasnan di famia a gasta un promedio di US$42 i US$41 pa luna na awa di bebe, e gastunan mas abou di tur bario.
E gastunan total di awa di bebe ta un kombinashon di gastunan fiho i variabel. Debí na un supsidio di Ministerio di Infrastruktura i Maneho di Awa i un supsidio adishonal di poder di kompra di Ministerio di Asuntunan Sosial i Empleo, gastunan fiho a baha na 2024. Gastunan variabel, di otro banda, a oumentá. Debí na e supsidionan riba gastunan fiho, barionan ku un konsumo di awa di bebe mas abou lo paga ménos pa nan kuentanan di awa na 2024 ku e aña anterior.
Imágen: © CBS