Inflashon ta baha na Hulanda Karibense
Na Boneiru, produkto i servisio pa konsumidó tabata 5,3 porshento mas karu den e di dos trimèster 2025, ku un aña anterior. Den e promé trimèster di 2025 inflashon ainda tabata 5,9 porshento. CBS ta anunsiá esaki basá riba e índise di preis di konsumidó Hulanda Karibense.
Na Sint Eustatius preisnan riba base anual tabata 1,1 porshento mas haltu ku den e di dos trimèster di 2025, den e promé trimèster inflashon tabata 2,2 porshento. Na Saba inflashon tabata 4,2 porshento den e di dos trimèster, un trimèster promé, 4,8 porshento.
Preis na Boneiru 0,5 porshento mas haltu kompará ku e trimèster anterior
Preis na Boneiru a subi den e di dos trimèster ku 0,5 porshento, kompará ku e promé trimèster di 2025. Preis di rekreashon i kultura ku a subi ku 3,5 porshento a yuda okashoná e subida akí. Asina entre otro material di imprenta i elektrónika pa konsumidó a bira mas karu. Preis di enseñansa a subi ku 5,3 porshento. Preis di paña i sapatu tambe a subi ku 3,1 porshento. Esaki ta partikularmente debí na un subida di preis pa paña di beibi i mucha i sapatu di hende muhé.
Den e di dos trimèster muebel a bira 2,7 porshento mas barata, kompará ku e promé trimèster. Transporte aéreo di persona a bira 2,6 porshento mas barata.
Preis na Sint Eustatius 0,9 porshento mas haltu ku trimèster anterior
Na Sint Eustatius preis di konsumidó a subi den e di dos trimèster di 2025 ku 0,9 porshento, kompará ku e promé trimèster di 2025. Meskos ku na Boneiru, paña i sapatu a bira mas karu ku den e trimèster anterior: na Sint Eustatius preis a subi ku 7,5 porshento. Esaki ta debí partikularmente na subida di preis di paña di hende muhé i mucha i sapatu di hende muhé. Preis di rekreashon i kultura a subi ku 3,5 porshento, partikularmente debí na subida di preis pa servisio di ‘streaming’. Preis di transporte tambe a subi ku 2,2 porshento. Esaki ta partikularmente debí na subida di preis di pasashi ku barku i avion. Transporte di persona marítimo a bira mas karu, pa motibu ku entrante 1 di mei 2025, a redusí e supsidio ku tabata hasi biahamentu ku servisio di fèri mas barata.
En kambio, produkto di alimentashon i bebida sin alkohòl a bira 0,3 porshento mas barata. Esaki ta prinsipalmente debí ku preis di webu a baha despues di un subida fuerte e trimèster anterior.
Preis na Saba a subi ku 0,7 porshento kompará ku e trimèster anterior
Na Saba preis a subi den e di dos trimèster di 2025 ku 0,7 porshento, kompará ku e promé trimèster di 2025. Meskos ku na Boneiru i Sint Eustatius paña i sapatu a bira mas karu ku den e trimèster anterior: na Saba preis a subi ku 8,2 porshento. Esaki ta partikularmente debí na subida di preis di paña di hende muhé i di mucha i sapatu di hende muhé. Preis di produkto di salú a subi ku 2,8 porshento. Preis pa transporte tambe ta mustra un subida di 0,9 porshento. Meskos ku na Sint Eustatius, transporte marítimo di persona a bira mas karu, debí na redukshon di e supsidio pa servisio di fèri. Ademas preis di gasolin i disel a subi.
En kambio preis di merkansia i servisio pa mantenshon diario di bibienda a baha den e di dos trimèster di 2025.
Sifranan tentativo
E sifranan di e di dos trimèster di 2025 ta tentativo i ta stipulá nan definitivamente ora publiká e di tres trimèster di 2025.
E sifranan tentativo di e promé trimèster di 2025 ta ahustá. Pa Boneiru tin kambio den e índise di transporte, debí na kambio ku a resultá for di análisis i prosesamentu definitivo di dato.
Fuentenan:
StatLine - Caribisch Nederland
https://opendata.cbs.nl/CBS/nl/dataset/84046NED/table?dl=BFA9
