Notisia24-07-2025 | 17:32

Partikularmente na Boneiru i Saba ta tenta mucha muhé mas frekuente ku mucha hòmber. Mucha hòmber i mucha muhé ku nan ta tenta, ta bisa ku nan ta ménos kontentu i ménos satisfecho ku nan bida. Tambe nan por papia masha poko tokante nan problemanan personal. Esaki sifranan nobo di e Investigashon di alumno Hulanda Karibense ta demostrá, ku a ehekutá fin di 2024, den kuadro di e Mónitòr di Hubentut Nashonal.

Na 2024, den e último diesdos lunanan, na Saba a yega di tenta 24 porshento i na Boneiru 22 porshento di e alumnonan (te 18 aña) den enseñansa avansá (vo) i enseñansa profeshonal sekundario (mbo). Na Sint Eustatius esei tabata 14 porshento. Tentamentu ta sosodé den mayoria kaso ‘offline’: na Boneiru i Saba partikularmente ku chisma i na Sint Eustatius ku ofensa.

Riba tur e islanan ta tenta mucha muhé promedio mas frekuente ku mucha hòmber. E diferensia akí ta mas grandi na Saba i Boneiru. Na Saba a tenta 31 porshento di e mucha muhénan i 17 porshento di e mucha hòmbernan. Na Boneiru tabata trata di 26 i 18 porshento. Na Sint Eustatius tabata trata di 16 kontra 12 porshento.

Hóbennan ku nan ta tenta ta ménos kontentu i satisfecho

Tambe a puntra e hóbennan riba e islanan pa duna nan felisidat i satisfakshon un sifra di rapòrt entre 1 i 10. Den 2024 hóbennan na Saba a duna pa tantu nan felisidat komo nan satisfakshon promedio un 7,4. Na Boneiru hóbennan a duna un 7,5 pa nan felisidat i un 7,4 pa nan satisfakshon, i na Sint Eustatius felisidat i satisfakshon a risibí un 7,1 en un 6,9.

Hóbennan ku nan a tenta den e último diesdos lunanan, a duna promedio sifra mas abou pa nan bienestar, ku hóbennan ku nan no a tenta. E diferensia akí ta partikularmente visibel na Boneiru i Sint Eustatius. Na Boneiru hóbennan ku nan a tenta, a duna promedio un 6,9 pa nan felisidat i un 6,8 pa satisfakshon ku bida. Serka hóbennan ku nan no a tenta, esei tabata promedio un 7,8 i 7,7. Na Sint Eustatius e sifranan akí tabata 5,7 i 5,9 serka hóbennan ku nan a tenta, i 7,5 5 i 7,2 serka hóbennan ku nan no a tenta. Na Saba tabatin apénas diferensia den felisidat i satisfakshon entre hóbennan ku nan a tenta òf no.

No ta tur alumno por papia den konfiansa ku un persona tokante problemanan personal

Pa bienestar di hóben ta importante ku nan por papia ku un persona den nan besindario tokante problemanan personal. Na 2024, 69 porshento di e alumnonan na Boneiru a bisa ku nan por papia ku un persona ku nan ta konfia tokante nan problemanan personal. Na Saba esei tabata 57 porshento i na Sint Eustatius 54 porshento. Riba tur e islanan promedio, hóbennan ku nan ta tenta, masha poko por papia ku un persona ku nan ta konfia, kompará ku esnan ku nan no a tenta.

Splikashon

Alumno - Den enseñansa avansá ta trata di alumno, i na mbo di studiante. Pa fasilitá lesamentu, den e boletin akí sinembargo ta yama studiantenan di mbo tambe alumno.

Konekshonnan relevante: