Durante e próksimo lunanan Ofisina Sentral di Estadístika (CBS) lo ehekutá un investigashon bou di sektor empresarial riba e islanan di Hulanda Karibense, komo parti di enkuesta riba Kuenta Nashonal. E aña di investigashon ta 2024. E investigashon aki tin komo meta pa hasi un inventarisashon di desaroyo ekonómiko na Bonaire, Saba i Sint Eustatius. CBS lo aserká e empresanan riba e tres islanan pa kompletá e kuestionario.
Imágen: © CBS
CBS lo publiká e resultadonan di e investigashon den e último trimèster di aña 2026.
Algun resultado di e Enkuesta riba kuenta Nashonal di 2023:
- Ekonomia di Boneiru a krese ku 6.3 porshento na 2023. E kresementu aki a wòrdu impulsá prinsipalmente pa e industria di konstrukshon (21.4 porshento) i maneho di energia, awa, i shushi (18.3 porshento). E industria di hospitalidat i servisionan finansiero tambe a duna un kontribushon signifikante.
- Riba St. Eustatius, e ekonomia a baha ku 0.5 porshento. Atministrashon públiko, en partikular, a pisa riba GDP, ku un bahada di 6.3 porshento den volúmen laboral. Edukashon i kuido di salú tambe a kontribuí na e kontrakshon, apesar di un oumento leve di turismo.
- Na Saba, ekonomia a baha ku 1.6 porshento. E bahada aki tabata prinsipalmente debí na ménos studiante den enseñansa i un bahada di 4 porshento den kantidat di trabou den atministrashon públiko.
- Riba St. Eustatius i Saba, enseñansa i atministrashon públiko konhuntamente a kontribuí na e kontrakshon ekonómiko. Na Boneiru, e kresementu fuerte den e sektor di konstrukshon tabata partikularmente notabel, miéntras ku agrikultura i mineria a baha ku 34 porshento.
Pa por garantisá éksito di e investigashon riba tur tres isla, CBS ta pidi koperashon di tur empresa. Pa lei, CBS tin e obligashon di trata tur dato rekolektá na un manera estriktamente konfidensial. Pa mas informashon i pregunta òf yudansa ku e kuestionario por tuma kontakto ku ofisina di CBS.