Mas di 300 hóben na Boneiru a partisipá djamars 25 di ougùstùs 2026 na For di Gara 2.0, un tayer tokante influensia i eksplotashon kriminal. Nan a deskubrí kon un hende por haña mas i mas influensia riba bo paso pa paso, i kon importante ta pa rekonosé na tempu ku algu no ta korekto. Tres eksperto di eksperensia propio a kompartí nan historia personal i a papia ku e hóbennan tokante eskoho, konsekuensia i e influensia di nan ambiente.
Eksplotashon kriminal no semper ta kuminsá ku algu ku ta sinti malu mesora. E por kuminsá ku un rekompensa, atenshon èkstra, e deseo pa pertenesé na un grupo, mester tene algu sekreto òf preshon pa disidí lihé. P’esei ta importante pa hóbennan siña rekonosé e diferente formanan di influensia aki.
Durante e tayer tabatin kuater forma sentral: rekompensa, atenshon i pertenesé na un grupo, sekresia i preshon di tempu. Ku ehèmpelnan rekonosibel, e hóbennan a papia tokante esaki ku e ekspertonan di eksperensia propio.
Storianan personal ta hasi e konsekuensianan visibel
E tres ekspertonan di eksperensia propio a papia ku e hóbennan for di nan mes eksperensia. Nan a konta tokante e influensia di amigunan i nan ambiente, e deseo pa pertenesé, eskoho robes i e konsekuensianan di esakinan. Tambe a bini e pregunta dilanti: ken ta bo amigunan i kon nan ta influensiá e eskoho ku bo ta hasi?
Tambe nan a papia tokante loke eskoho robes por nifiká despues pa skol, trabou i oportunidatnan den futuro. Un di e ekspertonan di eksperensia propio a yama un deklarashon di bon kondukta (Verklaring Omtrent het Gedrag) (VOG) asta “bo di dos diploma”. Pa sierto estudio, stage i trabou bo mester di un VOG. Si bo a bini den kontakto ku hustisia, esaki por hunga un papel despues ora bo mester di un VOG.
E kombersashonnan no tabata solamente tokante loke por bai robes. E ekspertonan di eksperensia propio tambe a enfatisá ku hóbennan mes tin influensia riba e rumbo ku nan bida ta bai. Tambe si bo a hasi eskoho robes, bo por skohe un otro direkshon.
Un di e ekspertonan di eksperensia propio a ekspresá esaki asina:
“Al final abo mes ta esun ku ta motivá bo mes positivamente òf negativamente. Mi tin un yu di 9 luna. Boso ta e futuro. Kisas un di boso lo ta su maestro, su coach òf un otro hende ku lo hunga un papel importante den su bida. E eskoho ku boso ta hasi awor ta konta.”
E ta korekto?
Un mensahe importante ku e hóbennan a haña ta pa no sigui otro outomátikamente ora un hende pidi nan hasi algu.
Nan ta ofresé bo algu? Bo mester tene algu sekreto? Bo ta sinti preshon pa disidí lihé? Para ketu un ratu i puntra bo mes: Esaki ta korekto?
Si algu no ta sinti bon, para. Pensa. Papia ku un hende ku bo ta konfia.
Traha huntu pa konsientisashon
For di Gara 2.0 ta parti di e programa anual tokante Trafikashon- i kontrabanda di hende na Hulanda Karibense. Dentro di e enfoke aki, Ministerio di Hustisia i Seguridat, RIECCN, IND Hulanda Karibense, JICN, KPCN i e skolnan di enseñansa sekundario ta traha huntu pa prevení i rekonosé eksplotashon.
Ku ‘For di Gara’ ta pone atenshon riba eksplotashon kriminal bou di hóbennan. No ta solamente hóbennan tin un papel den esaki. Mayornan, skolnan i otro hendenan den nan ambiente por yuda tambe pa medio di rekonosé señalnan i papia tokante nan.
Bo ta pensa ku abo òf un hende ku bo konosé tin di haber ku eksplotashon kriminal? Papia ku un hende ku bo ta konfia. Semper tin un salida.
Mas informashon: http://www.rijksdienstcn.com/Fordigara