Habitantenan di Sint Eustatius ta duna nan felisidat i otro aspekto di satisfakshon di bida un puntuashon mas haltu ku habitantenan di Boneiru i Saba. Na Sint Eustatius, 60 porshento di habitante ta indiká ku bida diario a mehorá òf a mehorá signifikantemente durante e último sinku (5) aña. Sinembargo, bida no a mehorá pa tur habitante: na Saba, 45 porshento ta indiká ku bida diario a deteriorá òf a deteriorá signifikantemente. Na Boneiru e sifra ei ta 29 porshento, i na Sint Eustatius 8 porshento. Esaki ta resultá for di e sifranan mas resien riba satisfakshon, felisidat i konfiansa den Hulanda Karibense di Centraal Bureau voor de Statistiek (CBS).
Imágen: © CBS
Habitantenan di Boneiru, Sint Eustatius i Saba ta duna nan felisidat un puntuashon entre 8.0 i 8.5. E puntuashonnan pa e sup-aspektonan di satisfakshon ta varia entre 7.2 i 8.4. Na Sint Eustatius, e habitantenan ta mas satisfecho ku nan situashon finansiero na 2025 ku na 2021. Riba otro elementonan di satisfakshon, e puntuashonnan ta komparabel den e dos (2) añanan aki. Na Boneiru i Saba, no tin kambio den e puntuashonnan pa felisidat i satisfakshon entre 2021 i 2025.
Mayoria persona bibando na Sint Eustatius ta mira mehorashon den nan bida
Riba e pregunta si bida diario pa hende riba e isla kaminda nan ta biba a mehorá, deteriorá, òf a keda meskos durante e último sinku (5) añanan, 60 porshento di e habitantenan di Sint Eustatius a kontestá ku bida diario a mehorá (signifikantemente). Esei ta mas ku na Boneiru (37 porshento) i Saba (33 porshento).
Na Saba, 45 porshento ta bisa ku bida diario a bai atras (signifikantemente). Na Boneiru, esaki ta 29 porshento, i na Sint Eustatius, 8 porshento. CBS no a investigá dikon hende ta kere ku bida diario a mehorá òf a bai atras.
Habitantenan di Sint Eustatius mas satisfecho ku Entidat Públiko
E enkuesta tambe a trata kon satisfecho e habitantenan ta ku Entidat Públiko. Esaki ta e gobièrnu lokal, inkluyendo e atministrashon di e isla. Na Boneiru, un kuart di e habitantenan ta (hopi) satisfecho ku e Entidat Públiko, na Sint Eustatius mas ku mitar (54 porshento), i na Saba 28 porshento.
Na Boneiru, un tersera parti ta (hopi) malkontentu ku gobièrnu lokal. Na Sint Eustatius, esaki ta 10 porshento, i riba Saba, 27 porshento. Habitantenan di Sint Eustatius ta esnan mas satisfecho ku funshonamentu di e Entidat Públiko, i habitantenan di Boneiru esnan ménos satisfecho.
Hendenan na Boneiru i Saba ta ménos satisfecho ku Gobièrnu di Reino kompará ku hendenan di Sint Eustatius.
Tambe a hasi pregunta tokante funshonamentu di Gobièrnu di Reino, manera Rijksdienst Caribisch Nederland. Habitantenan di Sint Eustatius mayoria biaha ta (hopi) satisfecho, i habitantenan di Boneiru i Saba ménos. Pueblo riba e dos islanan aki mas biaha ta malkontentu òf hopi malkontentu ku Gobièrnu di Reino. Riba tur tres isla, alrededor di 38 porshento no ta satisfecho ni malkontentu ku esaki.
