Inflashon ta baha na Boneiru i Saba, i ta subi na Sint Eustatius

Na Saba, den e di kuater trimèster di 2025, preisnan tabata 2,9 porshento mas haltu ku un aña anterior. Den e di tres trimèster, inflashon tabata 3,5 porshento. Na Sint Eustatius, inflashon tabata 2,2 porshento den e di kuater trimèster. Un trimèster anterior esaki tabata 1,9 porshento.

Ku e sifranan di e di kuater trimèster, e sifranan anual tambe ta konosí. Den 2025 e nivel di preis promedio na Boneiru tabata 4,3 porshento mas haltu ku den 2024. Na Saba, e preisnan tabata 3,8 porshento mas haltu ku den 2024 i na Sint Eustatius e tabata 1,8 porshento mas haltu. Na Boneiru i Saba esaki ta partikularmente pa motibu di e supsidio riba awa i koriente ku a para na komienso di 2025 i ku a bin bèk durante e di tres trimèster. Esaki a sosodé na Sint Eustatius tambe, pero aki e efekto ta ménos visibel. Ademas por nota subida di preis di kuminda i bibida sin alkohòl riba tur e islanan. Desaroyo di preis pa paña i sapatu tambe ta kontribuí na subida di e nivel di preis, partikularmente na Saba i Sint Eustatius. Finalmente preis di ‘horeca’ tambe a subi na Saba.

Preisnan na Boneiru, 1,0 porshento mas abou ku den e di tres trimèster

Preisnan na Boneiru a baha den e di kuater trimèster ku 1,0 porshento kompará ku e di tres trimèster di 2025. E bahada akí tabata partikularmente pa motibu ku e preisnan di bibienda, awa i koriente a baha promedio ku 3,8 porshento. Asina preis di suministro di awa i koriente a baha respektivamente ku 20,5 i 4,6 porshento. Esaki ta debí ku e supsidionan pa awa di bebe i koriente, ku a para na komienso di 2025, a bolbe keda introdusí den e di tres trimèster. Esaki ya a kousa un bahada den e di tres trimèster kaba, pero tin su efekto tambe den e di kuater trimèster. Transporte tambe a bira 0,7 porshento mas barata den e di kuater trimèster, kompará ku e di tres trimèster. Transporte aéreo di pasahero a baha 3,2 porshento den preis, despues ku esaki hustamente a bira konsiderablemente mas karu den e di tres trimèster.

Preisnan na Saba, 0,2 porshento mas haltu ku trimèster anterior

Na Saba, preisnan a subi den e di kuater trimèster di 2025 ku 0,2 porshento kompará ku e di tres trimèster. Preis di kuminda i bibida sin alkohòl a subi e trimèster akí ku 1,4 porshento. Asina awa mineral a bira 3,5 porshento mas karu, kompará ku e trimèster anterior. Produktonan di karni a subi den preis, partikularmente karni di baka a bira mas karu, ku un subida di 5,9 porshento kompará ku e di tres trimèster.
Paña i sapatu a baha e trimèster akí den preis ku 3,1 porshento. Esaki tabata partikularmente notabel pa paña di hende muhé i parsialmente tambe pa paña di beibi i di mucha. Tambe produktonan pa mantenshon i drechamentu di bibienda a bira 4,0 porshento mas barata. Finalmente webu i ‘horeca’ tambe a bira un tiki mas barata.

Preisnan na Sint Eustatius, 0,5 porshento mas haltu ku e trimèster anterior

Na Sint Eustatius tambe preis di konsumidó a subi den e di kuater trimèster. Aki ku 0,5 porshento, kompará ku e di tres trimèster di 2025. Preis di kuminda i bibida sin alkohòl a subi e trimèster akí ku 2,8 porshento. Asina galiña a bira 9,8 porshento mas karu. Piská fresku i piská di fris a subi den preis ku 8,3 porshento. Ademas, batata i diferente kos dushi, manera chukulati i mangel, a bira mas karu.

Koriente a bira mas barata, kompará ku e trimèster anterior. Meskos ku na Boneiru, esaki ta pa motibu di e re-introdukshon di supsidio di koriente ku a para na komienso di e aña akí. Paña i sapatu a baha e trimèster akí den preis ku 3,1 porshento. Esaki tabata partikularmente notabel pa paña di hende muhé i parsialmente tambe pa paña di beibi i di mucha. Webu tambe a bira un tiki mas barata.

Sifranan tentativo

E sifranan tokante e di kuater trimèster i e sifranan anual di 2025 ta tentativo i lo stipulá nan definitivamente ora publiká e promé trimèster di 2026.