Pidi kompensashon pa akohida di mucha

Hasi petishon ki ora?

Si bo ke risibí e kompensashon pa akohida di mucha na komienso di e kuartal nobo, bo mester hasi bo petishon mas ku 2 luna adelantá. Manda bo formulario di petishon pa e di dos kuartal di 2026 pa mas tardá riba 26 di yanüari pa e Unidat SZW di RCN. 

Kon pa hasi petishon?

Pa bo petishon bo ta usa e formulario di petishon di e Unidat SZW di RCN. Esaki ta un fail di Excel. Den e fail aki entre otro bo ta yena e datonan di kada mucha i di e mayor(nan), manera nan ta pará den e kontrakt di akohida di mucha ku e mayor(nan). Ta importante pa bo yena e formulario di petishon kompletamente i konforme bèrdat. Na komienso di novèmber 2025 bo ta risibí e formulario di petishon pa e di dos kuartal di 2026.

Ora bo a yena e formulario kompletamente, bo ta mira mesora kuantu kompensashon bo ta haña probablemente. Kontrolá bon si tur e datonan ta klòp promé ku bo manda e formulario pa  kinderopvang@rijksdienstcn.com.

Bo ta kambia algu despues den bo petishon? E ora ei por surgi un retraso den e pago i kisas lo por hasi e pago te despues di kuminsamentu di e trimèster numa.

Bo ta akohé mas mucha durante e trimèster ku bo a pidi kompensashon p’e? E ora ei bo por hasi un petishon èkstra. E ora ei bo mester tin e kontraktnan di akohida èkstra tambe den bo atministrashon. Tambe, bo mester duna di konosé ora un kontrakt di akohida di mucha ta terminá.

Kiko mas bo mester manda?

Despues di bo promé petishon, bo mester manda solamente e formulario di petishon. Solamente  ora di bo promé petishon bo mester manda un estado di kuenta bankario firmá tambe. Asina e Unidat SZW di RCN por sa sigur ku e kompensashon pa akohida di mucha ta bai riba e number di kuenta korekto.

Pa e estado di kuenta bankario ta konta:

• E mester ta firmá pa e persona ku ta outorisá, manera registrá serka Kámara di Komersio.
• E nòmber i e number di kuenta mester ta klaramente visibel (por hasi otro datonan imposibel pa lesa).
• E no por ta mas ku 1 luna bieu.

Bo por manda un karta di referensia di banko tambe en bes di e estado di kuenta bankario. Abou riba e página aki bo por mira ehèmpelnan di esaki.

Bo nó tin nodi di manda èkstra komprobante huntu ku bo petishon, manera kontraktnan di akohida di mucha òf listanan di presensia. Sí bo mester warda e dokumentonan aki bon den bo propio atministrashon. E Unidat SZW di RCN por pidi pa nan despues durante un kontrol. E Unidat SZW di RCN tambe semper por pidi informashon adishonal. Por ehèmpel si a surgi un kambio òf serka bo promé petishon. 

Konfirmashon i disposishon

Si bo petishon ta kompleto, bo ta haña un konfirmashon ku a risibí esaki di e Unidat SZW di RCN.

Bo petishon no ta kompleto? E ora ei bo ta haña un aviso ku e petishon pa kompletá e datonan ku ta falta.

Despues di e kontrol pa e Unidat SZW di RCN bo ta risibí un disposishon. Esei ta un karta ku ta bisa:

• Si bo ta haña kompensashon pa akohida di mucha i kuantu
• Ki ora lo paga e montante i riba kua number di kuenta
• Otro remarkenan importante

A rechasá (un parti di) bo petishon? E ora ei den e karta bo por lesa pakiko.
Bo por oponé e ora ei denter di 6 siman.

Bo no ta haña kompensashon pa un mucha? E ora ei e Unidat SZW di RCN lo informá e mayor tambe  tokante esaki.

Informá tokante kambionan

Tin kambionan? Por ehèmpel den e muchanan ku bo ta duna akohida? Informá nos mesora tokante esaki e ora ei.

Bo derecho riba kompensashon pa akohida di mucha por terminá for di e promé dia di e luna siguiente si:

• Bo no ta kumpli mas ku e kondishonnan.
• E kontrakt di akohida ku e mayor ta terminá.
• E mayor no a paga kontribushon di mayor pa tres luna siguí (paga tinu: bo mester kobra e kontribushon di mayor tur luna sí).

Ora ún di e situashonnan aki surgi, ta importante pa bo mèldu esaki serka e Unidat SZW di RCN. Asina bo ta prevení ku despues bo mester paga bèk.

Bo a haña muchu hopi òf muchu tiki kompensashon pa akohida di mucha? E ora ei nos lo kompensá esaki serka bo siguiente petishon. Den kasonan spesial tambe por fasilitá un forskòt èkstra entretantu.

Pregunta?

Bo ta duda òf bo tin pregunta tokante yena e formulario di petishon? Tuma kontakto e ora ei ku e Unidat SZW di RCN via kinderopvang@rijksdienstcn.com òf yama bo case manager via +599 795 5698.