Bo mester tuma liber pa solushoná un problema privá urgente? E ora ei bo por hasi uso di ferlòf di kalamidat. Pa kuantu tempu por tuma ferlòf di kalamidat, ta dependé di e situashon.
Bo por tuma ferlòf di kalamidat pa e kantidat di tempu ku mester pa solushoná un problema privá urgente. E por dura for di algun ora pa algun dia. Regla un lotgiter den kaso di un pipa di awa ku a rementá por ehèmpel, ta tuma algun ora di tempu. Pa regla entiero òf kremashon di un miembro direkto di famia kisas mester di algun dia di ferlòf.
No tin un kantidat di ora máksimo na vigor pa ferlòf di kalamidat den un aña. E salario ta sigui kore durante e ferlòf di kalamidat.
Den e siguiente kasonan bo tin derecho riba ferlòf di kalamidat:
- Ora ku pa motibu di un situashon inesperá bo mester tuma liber mesora.
Por ehèmpel:- Bo mester buska bo yu malu na skol;
- Bo pipa di awa a rementá i bo mester regla un lotgiter mesora;
- Bo kas ta na kandela.
- Ora ku pa motibu di situashonnan personal hopi spesial bo mester tuma liber.
Por ehèmpel:- Bo partner mester duna lus;
- Relashoná ku e kuido nesesario riba e promé dia di enfermedat di un miembro di famia yegá òf un relashon sosial di e kolaboradó;
- Un miembro direkto di famia ta fayesé. E miembro di famia ta un famia di sanger di abo, bo esposo(a) òf bo partner registrá den liña direkto òf den e di dos grado di e liña indirekto;
- Bo mester bai dòkter i esaki ta posibel solamente den ora di trabou. Òf bo mester kompañá un hende hopi yegá di bo bai dòkter kuné.
- Ora bo por ehekutá un regla legal òf obligatorio di gobièrnu solamente ora bo tuma liber.
Por ehèmpel:- Bo mester registrá nasementu di bo yu na kranshi.
- Ora bo por vota solamente bou di ora di trabou.
Pidi ferlòf di kalamidat serka dunadó di trabou
Un kalamidat bo ta mèldu mas pronto posibel serka bo dunadó di trabou. Tambe bo ta duna e motibu i kon largu bo ta ferwagt ku e ferlòf ta bai dura. Bo dunadó di trabou por pidi despues pa un komprobante ku ta demostrá ku e ferlòf tabata nesesario (por ehèmpel un karta di afsprak di un dòkter di kas).
Bo dunadó di trabou por rechasá e petishon di tuma ferlòf, si interesnan importante di negoshi òf servisio ta oponé esaki. Den e kaso ei, e dunadó di trabou ta indiká su rechaso por eskrito i ta menshoná e motibunan di su rechaso.