Ferlòf di kuido di durashon kòrtiku

Tin un otro hende ku por tuma e kuido riba dje? E ora ei bo no tin derecho riba ferlòf di kuido di durashon kòrtiku.

Por ehèmpel: bo no por tuma ferlòf di kuido di durashon kòrtiku pa un hende ku ta den hospital, pasobra e hende malu ta hañando kuido kaba.

Den un periodo di 12 luna siguí bo por tuma un máksimo di dos biaha e oranan ku bo a traha pa siman na ferlòf di kuido di durashon kòrtiku. Bo dunadó di trabou no tin e obligashon pa sigui paga bo salario durante e ferlòf di kuido di durashon korto (pero e por skohe pa hasi esaki sí).

Bo por tuma ferlòf di kuido di durashon kòrtiku pa kuido di e siguiente hendenan den bo alrededor:

• Yunan (di kriansa), partner, mayornan, welanan, nietunan, rumannan (famia di sanger di di dos grado);
• Otronan den bo kas di famia (por ehèmpel un tanta ku ta biba serka bo);
• Konosínan (un hende ku bo tin un relashon sosial kuné). Ehèmpelnan di esaki ta: suegronan, un bisiña òf un amigu. Sí, e relashon mester ta tal ku ta lógiko ku ta abo tin ku sòru pa e persona ei. E kondishon ta keda ku abo ta e úniko ku por sòru pa e hende malu.

Pidi ferlòf di kuido di durashon kòrtiku serka dunadó di trabou

Bo ta mèldu e ferlòf di kuido di durashon kòrtiku mas pronto posibel serka bo dunadó di trabou. Tambe bo ta indiká e motibu i kuantu tempu bo ta ferwagt ku e ferlòf por bai dura. Bo dunadó di trabou por pidi despues pa un komprobante ku ta demostrá ku e ferlòf tabata nesesario (por ehèmpel un karta di afsprak di un dòkter di kas).

Bo dunadó di trabou por rechasá e tumamentu di ferlòf, si interesnan importante di negoshi òf servisio ta oponé esaki. Den e kaso ei, e dunadó di trabou ta indiká su rechaso por eskrito i ta menshoná e motibunan di su rechaso.

Ferlòf di kuido den eksterior

No a stipulá den lei ku e kuido durante e ferlòf di kuido di durashon korto mester tuma lugá na bo propio isla. Pues bo por tuma ferlòf di kuido tambe pa kuida un hende yegá den eksterior.