Inspekshon di Labor ta bai apliká kontrol mas severo riba trahamentu ilegal

E sistema di kontrol di Inspekshon di Labor riba kumplimentu ta kambia entrante 1 di yanüari 2018. Kaminda den pasado Inspekshon di Labor tabata duna un atvertensia promé, awor Inspekshon di Labor lo bai over mesora na dunamentu di prosèsferbal pa violashonnan di lei WavBES.

Porta

Loke Inspekshon di Labor ta bai kontrolá severo ta, ku kada trahadó ta kana ku un karnèt di identifikashon bálido i por mustra esaki. Banda di esei mester tin un pèrmit di trabou bálido na e lugá di trabou di e estranhero i mester por mustra e Inspektor esaki riba su petishon. Hulandesnan ku no ta lokal i merikanonan ku ta traha akí pa largu tempu, mester disponé di un asina yamá “Verklaring van rechtswege”. Tambe si e estranhero ta traha pa medio di un büró di detashamentu òf un ‘uitzendbureau’, mester por mustra e dokumentunan rekerí.

Pa loke ta trata fiamentu di estranheronan serka bürónan di detashamentu òf un uitzendbureau, esun ku fia tambe ta e doño di trabou den sentido di WavBES. Esaki ta nifiká ku si e bürónan di detashamentu òf e uitzenbureau no tin un pèrmit di trabou bálido, e kompania ku ta fia tambe ta violá WavBES. WavBES ta konsiderá komo dunadó di trabou, tantu esun ku ta fia komo esun ku ta suministrá i ámbos ta haña un prosèsferbal. E responsabilidat den kadena akí ta aplikabel tambe si bo ta fungi komo dunadó di enkargo.
A yega na e sistema nobo di kontrol riba kumplimentu WavBES,  den konsulta ku Ministerio Públiko. Punto di salida ta ku Ministerio Públiko pa medio di un prosedura aselerá lo imponé un but di $3000 pa kada violashon riba e dunadó di trabou. Si tin otro echonan serio manera trafikashon di hende òf si e kompania bolbe kometé fayo denter di dos aña, e ora ei Ministerio Públiko por hiba e kaso dilanti di hues.

Ta importante pa sa ku gran mayoria di kompanianan ta kumpli kabalmente ku lei i regulashon. Si tur kos ta na òrdu, e ora ei no mester tin miedu di nada. Intenshon di e maneho mas severo di kontrol riba kumplimentu ta pa partikularmente atendé ku kompanianan ku ta violá lei sistemátikamente i pa e motibu ei tin probecho kompetitivo.

Inspekshon di Labor ta supervisá entre otro e Lei labor estranheronan BES (WavBES). Den WavBES i lei i regulashon su tras ta regla uso di estranheronan. Metanan di e lei ta: (1) prevení ku eksklushon di e oferta laboral lokal ta tuma lugá, (2) prevení kompetensia inhustu entre kompanianan i (3) ku ta abuzá di estranheronan. Na mei 2017 a detayá mas e reglanan rondó di uso di estranheronan. Awor ora di dunamentu di pèrmit di trabou ta evaluá mas minusioso si e petishonnan ta kuadra ku lei.