Representante di Reino ta bishitá Statia i Saba
Representante di Reino Gilbert Isabella a bishitá Sint Eustatius i Saba fin di siman tras di lomba. Meta di e bishita aki tabata pa e pone su mes na altura di e situashon riba e islanan despues di e pasada di e orkannan Irma i Maria.
Djabièrnè 22 di sèptèmber Isabella a yega Sint Eustatius komo su promé stòp di su bishita na Islariba. Gezaghèber interino, Julian Woodley a risibi’e. Despues a sigui un reunion kòrtiku ku e gezaghèber interino den su funshon komo presidente di e tim di kalamidat. Tambe ela papia ku e kordinadó di kalamidat, Edris Bennett. Isabella tabata presente tambe na e barbekiú pa yama danki, den e kazèrne di brantwer. Aki a yama danki na e miembronan di brantwer Boneiru i e marinirnan pa nan sosten i empeño enorme durante di e pasadanan di Irma i Maria. Ademas e Representante di Reino a hasi un tur ofer di e isla pa e mes mira kua ta e daño pasada di Maria a kousa.
Djasabra Isabella a biaha huntu ku su mènedjer di informashon/hurista durante di e kalamidat, pa Saba pa aya tambe papia ku e gezaghèber i su tim di kalamidat di e isla tokante di e manera kon e Sabanonan a eksperensiá e tormenta i e daño. E bista di e palu i matanan bashi na yegada na Saba, e sekura di e naturalesa i e daño ku a okashoná na e kasnan, a hasi un impreshon profundo. Den kombersashon ku un habitante, di kua su dak a bula bai, a haña un bista doloroso di kiko e daño pa e famia aki ta, ora a tira un bista den su kas. I asina tin hopi mas.
For di e ofisina di e Representante di Reino(Rijksvertegenwoordiging) a duna sosten promé, durante i despues di e pasada di e orkannan ku e petishonnan pa asistensia na e islanan, e petishonnan na Defensa, na e National Crisis Centrum i e Ministerio di Asuntunan Interno i Relashon di Reino.
Isabella:”Bo no por imaginá bo mes kuantu daño a kousa na biennan personal di e hendenan , e forsa di e violensia natural aki i e impakto riba bida diario di habitantenan di Statia i Saba. Banda di tur e pena personal, ta sigui tambe e daño ekonómiko pa hopi negoshantenan i nan trahadónan. Nos no mag di laga nos (rijksgenoten)partnernan den Reino nan so.”