Maneho pèrmit di trabou Saba suavisá

Na Saba a suavisá e maneho tokante pèrmit di trabou pa algun profeshon.

Windwardside

A establesé e maneho aki riba 30 di novèmber 2018, den estrecho konsulta entre Ministerio di Asuntunan Sosial i Empleo i outoridatnan lokal. Segun e prosedura nobo a redusí e asina yamá prueba di isla, kual ta rekerí dos òf sinku siman di búskeda di empleado lokal, te na 0 dia.  

E maneho aki ta aplikabel pa e siguiente kategorianan: dosente, instruktor di buseo, shèfkòk, dòkter i funshonnan ku un salario anual di mas di USD 50.000,-. Den e kasonan aki no mester buska empleado lokal simannan largu mas. E dunadó di trabou por kuminsá e prosedura di pidi TWV mesora. Si e mester notifiká Entidat Públiko Saba di e vakatura. 

Por lo pronto e prosedura nobo aki ta bálido solamente pa Saba, kaminda gobièrnu lokal mes a propon’é. Lo evaluá e areglo suavisá ku e diferente partidonan embolbí. For di esaki lo resultá si e kambio ta un mehorashon i si adaptashon ta deseá.