Enkuentro Diálogo Sentral Boneiru
Riba 15 di novèmber 2018 e partidonan ku ta tuma parti na e Diálogo Sentral Boneiru ta bolbe reuní den forma di un konferensia di mesa rondó. E Diálogo Sentral ta e konsulta entre sindikato, dunadó di trabou i gobièrnu tokante tópikonan sosial ekonómiko, por ehèmpel relashon laboral, seguridat sosial, kombatimentu di pobresa.
Tur partido embolbí por proponé tópiko pa e Diálogo Sentral ku tin relashon ku esei.
Na nòmber di ministerio di SZW, den palabrashon ku Entidat Públiko i e representantenan di trahadó i di dunadó di trabou, a nombrá un supervisor di proseso eksterno. Durante di e enkuentro akí e lo duna un man pa kuminsá di nobo ku e Diálogo Sentral, ku e periodo tras di lomba a stagna pa diferente motibu. E supervisor di e proyekto den e periodo tras di lomba a hiba diferente kombersashon ku entre otro representante di dunadó di trabou, trahadónan i entidat públiko Boneiru ku ta embolbí ku e Diálogo Sentral. E kombersashonnan tabata konstruktivo i e partisipantenan na e kombersashonnan a duna un kontribushon positivo. Nan ta kompartí e opinion ku un bon Diálogo Sentral por yuda nan propio partisipashon i posishon hopi, pero tambe e bienestar di Boneiru, kaminda por superá diferensia.
Ta intenshon pa durante di e enkuentro di 15 di novèmber hasi palabrashon konkreto tokante kontinuashon i strukturashon di e Diálogo Sentral den futuro. Por ehèmpel tokante stipulashon di e skema i frekuensia di reunion, tópiko i e momentunan di evaluashon. Tambe repartishon balansá di asiento bou di e diferente sektornan ta un tópiko di diskushon. E asientonan den Diálogo Sentral na e momentunan akí ta repartí entre USIBO, BBE, BONHATA, BHG, entidat públiko i Kámara di Komersio. Loke tambe ta un tópiko di diskushon ta e ròl di Ministerio di SZW den e Diálogo Sentral.
Jan-Willem van den Braak den pasado a yuda strukturá un diálogo sosial na Aruba tambe i sa for di e eksperensia ei kiko tin mester pa laga un diálogo sentral funshoná. ‘E aktitut konstruktivo di e partidonan te ku awor, ta duna hopi speransa ku pronto lo por start di nobo ku e Diálogo Sentral’, segun e supervisor di proseso.