Ekstrakto di djente kubrí pa SZW
RCN su unidat di Asuntunan Sosial i Empleo awor ta kubri ekstrakto di djente pa abitantenan di Boneiru ku entrada abou. Ta trata akí di hendenan ku no ta gana mas ku suèldu mínimo, ku ta risibí ònderstant òf ku tin penshun di behes AOV sin otro entrada. Esaki ta resultado di kòmbersashonnan entre tres práktika di dentista na Boneiru i unidat di SZW.
Abitantenan di Boneiru ku mas di 18 aña di edat mester paga pa e ekstraktonan akí nan mes. Personanan ku entrada mas abou, p’e motibu aki ta posponé un bishita na dentista pa basta tempu ora nan tin doló di djente. Unidat di SZW, pa medio di ònderstant partikular, por yuda abitantenan ku entrada abou ora nan haña nan ku gastunan haltu inesperá. Te ku resientemente esaki tabata enserá por ehèmpel artíkulonan di konsumo manera un frishidèr òf stof, òf pa kubri gastu di artíkulonan pa beibi. Awor a ekspandé e pakete di ònderstant partikular ku kubrimentu di ekstrakto di djente.
Abitantenan ku ta kere ku nan por bini na remarke pa e supsidio akí, por pasa ofisina di SZW durante orario di konsulta di ònderstant. Nan mester trese ekstrakto di kuenta bankario i prueba di entrada. Esnan ku ta bini na remarke, ta risibí un deklarashon. Ku esaki nan por bai dentista, kende lo no kobra e pashènt ora di ranka djente, sino lo kobra SZW.
Pa personanan ku ta risibí ònderstant e deklarashon ariba menshoná no ta rekerí. Nan por akudí direktamente na dentista, ku na su turno lo chèk na SZW si e persona berdaderamente ta risibí ònderstant.
Pagonan pa tratamentunan di dentista for di Ofisina di Seguro di Kuido ZVK no a kambia. Pa aseguradonan di 18 aña bai ariba, ta kubri prótesis ku por kita, tratamentu i atenshon dental kirúrgiko. Muchanan te ku 18 aña tin derechi riba pakete kompleto di kuido dental i kuido bokal via ZVK.
Saba i Sint Eustatius tin nan propio forma di kuido dental ku te ku awor no ta kai bou di ònderstant partikular.