AOV Èkstra pa grandinan ku entrada abou
Entrante promé di yanüari 2020, ta suplementá penshun di behes (AOV) pa mayornan di edat ku un entrada abou i ku tiki kapital propio (‘eigen vermogen’). Esaki ta un di e medidanan di Ministerio di Asuntunan Sosial i Labor pa halsa benefisio i pagonan na Hulanda Karibense.
Personanan di 64 aña òf mas ku tin un mínimo di 5 aña bibá na Hulanda Karibense di forma legal, por bini na remarke si nan tin un entrada ku ta mas abou ku suèldu mínimo legal (‘Wettelijk Minimumloon’, WML). Pa Boneiru e montante aki ta 951 USD pa luna. Na Saba i Sint Eustatius e montantenan ta respektivamente 1.134 USD i 1.147 USD. Posibel penshun di un dunadó di trabou anterior ta eksonerá te ku 54 dòler pa luna.
Ora ta determiná e derechi riba e AOV Èkstra, ta inkluí un persona su pertenensia personal tambe den e kalkulashon. Pa Boneiru e límite máksimo ta 8.760 USD. Pa Saba i Sint Eustatius, esakinan ta USD 10.460 i USD 10.600 respektivamente. Por lo tantu, personanan mayor di edat ku tin pertenensia personal balorá na mas ku e montantenan aki, no ta bini na remarke pa e AOV Èkstra aki.
Por apliká pa e AOV Èkstra entre 6 di yanüari i promé di aprel 2020 na unidat SZW di RCN. Esaki por segun sita òf durante orario di konsulta spesial. Tambe por lesa mas tokante AOV Èkstra riba e wèpsait di RCN.
Banda di e AOV Èkstra, e penshun regular di AOV tambe ta oumentá entrante 2020 pa tur persona ku tin derecho riba AOV. Esaki ta un oumento di 6.2% na Boneiru, 5.3% na Saba i 2.7% na Sint Eustatius. Personanan ku derecho riba AOV ta risibí e oumento outomátikamente riba nan kuenta.