Corona vírùs: pakete di emergensia pa empresario i trahadó di Hulanda Karibense
Meskos ku na Hulanda Oropeo, den e parti Karibense di reino tambe tin preokupashon grandi tokante efektonan di corona vírùs. Na Aruba, Kòrsou i Sint Maarten, Boneiru, Sint Eustatius i Saba tin awor un realidat nobo kaminda tin masha aktividat ku a yega na un paro. Pa e partinan Karibense di Reino ta konta ademas ku e paro kasi kompleto di tráfiko aéreo i turismo krusero, lo tin konsekuensia ekonómiko enorme.
Boneiru, Saba i Sint Eustatius ta forma parti integral di Hulanda , p’esei e País ta direktamente responsabel. P’esei esei awe gabinete a disidí pa tuma medidanan ekonómiko eksepshonal pa empleado i kompanianan na Boneiru, Sint Eustatius i Saba, relashoná ku
corona vírùs. E karta tokante e pakete di emergensia pa empleadonan di Hulanda Karibense, ta komparabel ku e karta ku gabinete a manda 17 di mart último pa parlamento hulandes tokante situashon na Hulanda Oropeo. E enfoke di e karta ta meskos i tambe e medidanan – ku adaptashon pa e situashon partikular di Hulanda Karibense – ta komparabel.
A manda e pakete awe pa parlamento hulandes na nòmber di e ministernan di Asuntunan Interno i Relashonnan den Reino, di Asuntunan Ekonómiko i Klima, di Finansa i e sekretarionan di estado di Asuntunan Sosial i Labor, Asuntunan Ekonómiko i Klima i Finansa. Minister Raymond Knops ta informá na nòmber di gabinete:
“Nos ta sinti nos komo gabinete masha envolví ku e situashon riba e islanan. E efektonan di corona vírùs ta enorme na Boneiru, Sint Eustatius i Saba. Debí na e limitashonnan imponé pa tráfiko di biahe, sektor turístiko, e sektor ku e islanan ta dependé masha di dje, ta práktikamente paralisá. Esaki tin efektonan grandi riba e chèns pa kompanianan hasi ganashi i e pa empleo. Ku e pakete nobo akí e empleado i kompanianan ta haña e sosten èkstra ku ta èkstra nesesario.”
E paisnan Aruba, Kòrsou i Sint Maarten ta outónomo, nan responsabilidatnan ta diferente ku esunnan di Hulanda Karibense. E paisnan tambe ta haña nan enfrentá ku efektonan di corona vírùs: efektonan médiko, sosial, ekonómiko i finansiero. E kontakto ku i entre e paisnan ta intensivo, pa asina nan por sostené otro kaminda ta nesesario. Den e situashon masha eksepshonal di e momentu akí , ta wak si a base di posibilidatnan ku Statüt di Reino ta brinda i e formulashon pa kasonan eksepshonal den lei i regulashon, por kapasitá e paisnan pa konfrontá e krísis mas mihó posibel.