Entrante awe SZW ta inisiá su areglo di emergensia
E konsekuensianan di e medidanan relashoná ku e vírùs corona pa hopi kompania ta impaktante. RCN su unidat di Asuntunan Sosial i Labor (SZW) ke evitá ku dunadónan di trabou ta haña nan fòrsá di kita empleado for di trabou. Pa yuda dunadónan di trabou tene nan personal, SZW a pone den funshon un areglo di emergensia pa Boneiru, Saba i Sint Eustatius.
Entrante awe dunadónan di trabou por entregá un petishon na unidat SZW di RCN pa un kompensashon di gastunan salarial. Mester trata di pèrdida di volúmen di benta di por lo ménos binti porshento relashoná ku e vírùs di corona ku a konsekuensia di esaki, bo no por tene bo personal na trabou (kompletamente). Den kaso di otorgamentu di e areglo di emergensia, lo kompensá e dunadó di trabou ochenta porshento di e salario di e trahadó pa e oranan ku e no por traha. Mester paga e montante aki komo salario na e empleado. Por usa e areglo aki tambe pa empleadonan ku un kontrakt di sero ora òf ku un kontrakt temporal.
SZW lo no aprobá pèrmitnan di retiro pa motibunan relashoná ku e vírùs di corona den e temporada ku e areglo di emergensia aki ta na vigor. E areglo di emergensia ta intenshoná pa evitá di kita personal for di trabou.
Personanan ku en konekshon ku e vírùs di corona no tin dunadó di trabou mas, nan mes por hasi aplikashon pa un sosten. Esaki por ta e kaso si no a prolongá nan kontrakt òf si nan tabata den tempu di prueba. Nan por bini na remarke pa ochenta porshento di e salario último ku nan a risibí. E areglo di emergensia ta brinda espasio pa yuda empresarionan independiente tambe ku ta afektá pa e medidanan en konekshon ku e vírùs di corona. Por suplementá nan entrada te ku ochenta porshento di e salario mínimo legal. E areglo di emergensia ta konta pa un periodo di tres luna i ta otorgá esaki retroaktivo entrante 13 di mart 2020.
Pa mas informashon i pa e formularionan di petishon, tira un bista riba www.rijksdienstcn.com/covid-19.
Por manda formularionan kompletamente yená ku e aneksonan rekerí, pa noodregelingSZW@RijksdienstCN.com.
Empresarionan na Boneiru ku mester di ayudo ku yenamentu di formulario, por dirigí nan mes na Kámara di Komèrsio via steunloket@KvKbonaire.com.
Personanan individual ku mester di ayudo, por traha un sita telefónikamente ku unidat SZW di RCN
Boneiru: +599 781 5555 òf 781 5556
Saba: +599 416 5652
Sint Eustatius: +599 319 -5693.