Ordenansa Insular i areglo di supsidio di akohida pa mucha ta drenta na vigor
Entrante 15 di yüli e Ordenansa Insular di Akohida di Mucha na Boneiru a drenta na vigor, ku kriterio di kalidat pa organisashonnan di akohida di mucha. For di e momento ei organisashonnan di akohida di mucha mester pidi un pèrmit di eksplotashon serka Entidat Públiko Boneiru (OLB). E areglo di supsidio temporal tambe a drenta na vigor na Boneiru. Ku esaki organisashonnan di akohida di mucha por baha e gastunan pa mayornan i mehorá e kalidat.
Konseho Insular a aprobá e Ordenansa Insular di Akohida di Mucha riba 7 di yüli 2020. E ordenansa ta stipulá ku organisashonnan di akohida di mucha di awor pa dilanti mester di un pèrmit di operashon pa por ofresé nan servisionan. Den e ordenansa tambe tin tur kriterio di kalidat ku e organisashonnan mester kumpli kuné pa haña i mantené e pèrmit aki. Pensa por ehèmpel riba e kantidat maksimal di mucha pa grupo, e kalidat pedagógiko, e nivel di edukashon di e trahadónan profeshonal i e seguridat di e fasilidatnan.
Organisashonnan di akohida di mucha ku ya tabata akohé mucha promé ku e e ordenansa a drenta na vigor, ta haña un temporada rasonabel pa kumpli ku e eksigensianan di kalidat. Den esaki nan ta haña yudansa di e programa BES(t) 4 kids. Por ehèmpel ora di redaktá un plan di maneho pedagógiko òf ku edukashon, pa asina e personal por kumpli ku e kriterionan di edukashon. Organisashonnan di akohida pa mucha ku ta kuminsá ofresé akohida pa mucha despues di e fecha di entrada di e ordenansa, mester kumpli ku e kriterionan di kalidat mésora na komienso.
Areglo di supsidio temporal
Organisashonnan di akohida di mucha i akohida despues di skol ku tin un pèrmit di eksplotashon por bini na remarke pa un supsidio pa baha e preis di kosto. Pa organisashonnan di akohida di mucha ku na 2019 a akohé mucha kaba, ta sufisiente si nan a entregá e petishon pa un pèrmit di eksplotashon serka OLB. Por apliká pa e supsidio for di promé di ougùstùs 2020 te ku 31 di yüli 5or di atardi ora lokal.
E supsidio pa baha e preis di kosto ta máksimalmente 200 dòler pa mucha pa luna pa akohida di pasadia i 150 dòler pa mucha pa luna den e akohida di pafó di skol.
Organisashonnan di akohida di mucha na Boneiru ku ta haña e supsidio, mester redusí e kontribushon finansiero di mayor temáksimal 200 dòler pa luna. Banda di esaki tin un kontribushon mínimo di mayor na vigor di 150 dòler pa luna pa pasadia i 100 dòler pa luna pa akohida pafó di skol. Esaki ta pa garantisá ku ta usa e supsidio tambe pa mehorá e kalidat di e akohida di mucha. Si e kontribushon finansiero di mayor ya kaba ta abou, e orei e supsidio ta pa drecha e kalidat. Mayornan ku no por paga e kontribushon mínimo di mayor, por pidi un supsidio pa un lugá na akohida serka OLB.
Mas informashon ta optenibel riba www.best4kids.nu i www.uitvoeringvanbeleidszw.nl/subsidies-en-regelingen/best4kids