Inspekshon di labor ta kontrolá kompania na Sint Eustatius
Inspekshon di labor a ehekutá diferente kòntròl na kompanianan na Sint Eustatius. Na dos kompania a bin topa ku un total di seis estranhero ku tabata permanesé ilegalmente riba e isla i pa kua no a otorgá pèrmit di trabou. KPCN i KMar a duna asistensia durante e kòntròlnan aki, ku a ehekutá di forma dirigí a base di señal. A pone e seis personanan konserní bou di supervishon di KPCN pa atendé ku nan mas aleu.
Na ámbos kompania no tabata trata di eksplotashon di labor. E dunadónan di trabou ta haña un but komo ku nan a violá e Lei di labor di estranhero BES. No ta permití pa laga trahadónan di afó traha sin un pèrmit pa esaki. E legislashon aki ta protehá e merkado di labor i ta kombatí konkurensia deshonesto.
E inspektornan di labor a konstatá algun violashon riba e área di e Lei di labor BES. Diferente dunadó di trabou a haña un atvertensia komo ku strukturalmente nan ta laga nan trahadónan traha mas ku kuarenta ora, miéntras nan no ta paga nan èkstra pa overtaim. Ta permití overtaim solamente bou di kondishonnan stipulá i kontra un kompensashon pa overtaim.
Banda di ehekushon di kòntròlnan den kuadro di trahamentu honesto, seif i salú, na e momentunan aki, inspekshon di labor ta investigá algun kaso na Sint Eustatius kaminda posiblemente tin froude ku e sosten di corona.