Inisio aplikashon pa kompensashon pa artíkulo di skol SZW

E aña aki un bes mas mayor di alumno na Hulanda Karibense por bini na remarke pa un kompensashon den gastu di artíkulo di skol manera unifòrm, sapatu i artíkulo pa skibi. Pa yu ku (despues di fakansi grandi benidero) ta bai skol avansá, mayornan por entregá un petishon na unidat SZW di RCN.

Schoolbenodigdheden

Boneiru

Kas di famia na Boneiru ku un yu na skol avansá i ku un entrada te $1.254 nèto pa luna, por bini na remarke pa e sosten aki. Si tin dos yu esaki no por ta mas ku $1.380 nèto pa luna. Ku tres òf mas yu e entrada máksimo no por surpasá $1.505.

Ta posibel pa apliká via di e-mail òf personalmente durante ora di konsulta spesial: riba 7, 8, i 9 di yüni, entre di 3or di atardi i 8or di anochi na Rincon (bestuurskantoor bieu), riba 14, 16 i 17 di  yüni di 3or di atardi pa 8or di anochi na Avanti na Antriol i  entrante 20 di yüni i yüli kompletu, di djaluna te ku djaweps entre 1or i 4or di atardi na e ofisina di SZW den Playa. Si un mayor òf kuidadó no por pasa na e orario di konsulta i tampoko por apliká digital, por traha un sita via di e e-mail onderstand@rijksdienstcn.com òf via WhatsApp +599 781 0343.

Saba i Sint Eustatius

Na Saba e límite di entrada ta $1.495 nèto pa luna pa kas di famia ku un yu na skol avansá i na Sint Eustatius esaki ta $1.518. Na Saba i Sint Eustatius tambe ta konta ku si tin mas yu, por apliká si e entrada ta mas haltu. Na tur dos isla mayor i kuidadó por entregá un aplikashon na e ofisina di SZW di djaluna te ku djaweps durante oranan di mainta.

Dokumentonan rekerí

Por haña e formulario di aplikashon riba www.rijksdienstcn.com bou di ‘Asuntunan Sosial’. Banda di esaki, e petishonarionan mester añadí un (kopia di un) sédula bálido, slep di salario i estado di kuenta di banko di último dos luna. Mester entregá e dokumentonan aki tambe di pareha di e petishonario si e ta forma parti di e mesun kas di famia. Ademas mester proba ku e yu ta bai skol sekundario dor di entregá prueba di inskripshon òf e último rapòrt di skol básiko.Un vògt òf mayor di kriansa mester entregá tambe un desishon ku ta ilustrá ku e ta e kuidadó legal.

Muchanan na skol básiko

Mayornan di mucha ku ta bai skol básiko por tuma kontakto ku e Entidatnan Públiko di nan isla pa e kondishonnan i dokumentonan nesesario. Na Boneiru, Entidat Públiko di Boneiru (OLB) tambe lo t’ei na e orarionan di konsulta spesial na Rincon i Antriol. E ora ei ta posibel pa durante un bishita, apliká pa e kompensashon aki pa tantu yunan siguiendo enseñansa avansá komo pa esnan na skol básiko.

Por mas informashon tokante e kampaña di Artíkulo pa skol di 2022, wak riba www.rijksdienstcn.com.