Yamada EPB i SZW na hendenan den isolashon òf karentena pa no bai trabou
Kralendijk - Entidat Públiko Boneiru i e unidat di Asuntu Sosial i Empleo / Sociale Zaken en Werkgelegenheid (SZW) ta hasi un yamada na hendenan ku mester ta den isolashon òf karentena, pa no bai trabou. Ku bista riba e kantidat haltu di kontagio, ta importante ku e hendenan akí ta keda kas.
Dunadónan di trabou por hasi un petishon na SZW pa ‘pèrdida di salario’ (supsidio di enfermedat). Esei ta un petishon pa un kompensashon di gastunan di salario pa trahadónan ku no por traha. Den e kaso akí ta bai pa trahadónan ku ta den isolashon òf karentena.
E doño di trabou mester notifiká SZW di e trahadónan akí riba e promé dia ku nan no ta bai trabou. Esei por via MijnCN.nl. E dòkter di seguro ta tuma kontakto ku e trahadó e ora ei pa kontrolá si e dunadó di trabou por haña ‘pèrdida di salario’ (supsidio di enfermedat) pa e trahadó den karentena òf isolashon. Ta asina ku tin kondishon pa haña ‘pèrdida di salario’ (supsidio di enfermedat) pa un trahadó asina.
EPB i SZW ta komprondé ku pa motibu di e kantidat haltu di kontagio, hopi dunadó di trabou ta konfrontá un situashon ku ménos personal. Tòg ta importante ku dunadó di trabou i trahadó ta tene nan mes na reglanan ku ta konta pa isolashon i karentena. I ku dunadónan di trabou no ta laga trahadónan ku mester ta na kas den isolashon òf karentena bai trabou. Asina dunadónan di trabou i trahadónan ta asumí nan responsabilidat i nan no ta pone salubridat públiko na peliger.
Inspekshon Laboral di SZW ta kontrolá si dunadónan di trabou ta tene nan mes na leinan pa un sitio di trabou sano i seif. Pues tambe si nan ta tene nan mes na e reglanan di corona ku ta na vigor awor. Trahadónan ku ta mira un situashon no seif na nan trabou, por papia esaki ku nan hefe. Si esaki no ta yuda, nan por akudí na Inspekshon Laboral via arbeidsinspectie@rijksdienstcn.com òf yama 781-5662.
Direktorado Supervishon i Mantenshon di Lei di EPB ta kontrolá entre otro si establesimentunan di horeca ta tene nan mes na orario di sera ku ta na vigor awor. Siudadanonan por yama Supervishon i Mantenshon di Lei via 715 5300 i 796 4850 pa notifiká ku enstablesimentunan no ta tene nan mes na reglanan di corona. Poko tempu pasá e direktorado a sera un establesimentu di horeca ora a resultá ku trahadónan ku mester tabata den karentena, tòg tabata trahando.