Kòntròl adishonal sosten di corona ta start
Na febrüari 2022 ta tuma lugá un kòntròl adishonal na Hulanda Karibense di e medidanan di sosten di corona ku for di mart 2020 te ku òktober 2021 tabata na enkargo di unidat SZW di RCN. Via e ‘Areglo di Emergensia di SZW’ i e ‘Kompensashon di EZK’, a otorgá na total mas o ménos 98 mion na sosten di emergensia na Boneiru, Saba i Sint Eustatius. E kompanianan ku a saka durante e sondeo, mester motivá e informashon ku nan a duna riba nan formulario di petishon ku dokumentashon mas aleu.
Te ku òktober 2021 mas ku 900 empresario na Hulanda Karibense a hasi uso di un òf tur dos medida di sosten. Ta otorgá e sosten di corona a base di informashon ku e petishonario yena. E a firma ku e informashon aki ta kuadra. A skohe pa e método aki e tempu ei, pa e sosten por yega serka e kompanianan afektá mas rápido posibel. E método ta rekerí integridat di e petishonario. Na momentu ku nan situashon kambia, kompará ku nan situashon na momentu di aplikashon, e kompanianan mester entregá un formulario di kambio. I si nan ta sospechá di ta risibí kompensashon inkorektamente, nan mester mèldu esaki.
Segun tempu, unidat SZW di RCN a tuma kontakto ku e petishonario solamente si tin señal di uso inkorekto di e areglonan. Si resultá ku a paga di mas, hopi bia den bon konsulta ku otro, ta deskontá òf paga bèk e montante. Ministerio Públiko (OM BES) ta atendé e kasonan kaminda tabatin sospecho ku a entregá informashon inkorekto intenshonalmente.
Den febrüari 2022, e kòntròl adishonal lo tuma lugá. Promé ku 1 di febrüari lo informá e kompanianan ku a selektá durante e sondeo tokante e kòntròl adishonal por eskrito. Inspekshon di Labor di unidat SZW di RCN ta ehersé e investigashon den kolaborashon ku Inspekshon di Labor di Hulanda. Meta di e kòntròl adishonal aki ta pa wak si e sistemátika relativamente simpel di e medidanan di sosten a funshoná. Banda di esei naturalmente tambe ta kontrolá e legalidat di e fondonan risibí.
E medidanan di sosten
A introdusí e Areglo di Emergensia di SZW i e Kompensashon di EZK na komienso di e krísis di corona pa sostené empresarionan na Hulanda Karibense ku gastunan di salario i gastunan fiho. For di 13 di mart 2020 te ku 12 di òktober 2021 aproksimadamente 700 empresa a hasi uso di e areglo di emergensia di SZW, pa por mantené 3535 trahadó na trabou. Banda di esaki, tabata suplementá e entradanan di 1079 empresario independiente i 554 eks empleado (ku no por a mantené nan trabou) a haña un kompensashon via e Areglo di Emergensia.
E ‘Kompensashon di EZK’ ta un supsidio for di Ministerio di Asuntunan Ekonómiko i Klima pa yuda empresario pa paga gastunan fiho durante di e krísis. E kompensashon ta konsistí di seis areglo ku ta sigui otro. Respektivamente 901, 563, 457, 419, 453 i 290 empresario a hasi usa di e areglo. Ámbos medida a terminá na òktober 2021, ora a resultá ku e ekonomia a kuminsá move atrobe.