Un Hulanda Karibense mihó, mas sigur i mas bunita
Kon nos ta trese e kadena di derecho penal i e kadena di imigrashon mas serka otro? Kiko nos tin mester di otro pa por aktua mihó? E preguntanan akí tabata sentral durante e mini konferensia di e kadena di imigrashon riba djaweps 26 di òktober 2023.
Gezaghebber interino di Boneiru Nolly Oleana a hasi apertura di e mini konferensia i a para ketu na e importansia di un bon koperashon den e kadenanan:
“Un bon koperashon mester ta e base pa pone un bon fundeshi pa e siguiente generashon.”
E gezaghebber interino ta kere ku si uni tur forsa [di tur partner den e kadena], por logra bon resultado. Loke e ta spera di e dia: ku lo hasi uso di tur potensial den sala pa dal e siguiente paso den e koperashon reforsá entre e kadena i pa hasi uso di esaki pa hasi Hulanda Karibense mihó, mas bunita i mas sigur pa un i tur.
Un programa yen i un sala yen
E programa a inkluí un variedat na presentashon, seshon di break-out i diskushon plenario. Tambe partnernan di kadena a para ketu na e aktividatnan ku a tuma lugá e aña akí a base di e resultadonan di e mini konferensia di aña pasá. Hopi organisashon den e kadena di imigrashon, manera Servisio di Imigrashon i Naturalisashon (IND), Asuntunan Sosial i Empleo (SZW), Plenchi di Trabou, Kuerpo Polisial Hulanda Karibense (KPCN), Koninklijke Marechaussee (KMar), Voogdijraad, Wardakosta, Ministerio Públiko BES i entidat públiko Boneiru i tambe kontrapartidonan di Hulanda Oropeo tabata representá.
Koperashon ta importante
Gezaghebber interino den su diskurso inougural a para ketu kaba na e importansia di un bon koperashon. Bentaha i nesesidat di e mini konferensia akí a keda demostrá. P’esei ta wak bèk positivamente riba e dia. Den e periodo benidero lo sigui traha riba palabrashonnan di trabou konkreto den e kadena.
Kiko ta e kadena di imigrashon i e mini konferensia?
E kadena di imigrashon ta konsistí di diferente organisashon ku ta traha huntu pa ehekutá e lei di imigrashon. E lei akí ta regla entrada, atmishon, supervishon i regreso di estranheronan. Un estranhero ta un persona ku no tin nashonalidat di e pais unda e ta permanesé.
Organisashonnan manera Servisio di Imigrashon i Naturalisashon (IND), Asuntunan Sosial i Empleo (SZW), Kuerpo Polisial Hulanda Karibense (KPCN), Koninklijke Marechaussee (KMar), Voogdijraad, Wardakosta, Ministerio Públiko BES, JICN, i e entidatnan públiko ta traha huntu pa logra metanan komun. Kada aña e kadena di imigrashon ta bin huntu a base di un tema sentral pa diskutí koperashon i hasi palabrashonnan tokante futuro.