Investigashon di finansiamentu akohida di mucha na Hulanda Karibense
Pa sòru ku e futuro kompensashon pa akohida di mucha ta realístiko i ku organisashonnan por sigui duna bon akohida di mucha, Ministerio di Asuntunan Sosial i Empleo (SZW) a laga hasi un investigashon di e kosto di akohida di mucha na Hulanda Karibense. A base di e investigashon aki, e ofisina di investigashon EBA (Economisch Bureau Amsterdam) ta duna konseho tokante e sistema di finansiamentu ku lokual por determiná altura di e futuro kompensashon pa akohida di mucha.
Den e proposishon di lei Kinderopvang BES (Akohida di mucha BES) ku e aña aki a manda pa Tweede Kamer, tin pará ku Gobièrnu Sentral ta bai paga gran parti di e kosto pa akohida di mucha. Finalmente mayornan lo mester paga solamente un parti chikitu di tur kosto. E sumanan eksakto mester establesé ainda. P’esei tabatin mester di investigashon di e kosto eksakto di akohida di mucha ora un akohida di mucha ta kumpli ku tur regla pa ‘ku bon kalidat. Awor a finalisá e investigashon aki, den lokual mas ku tres kuart parti di tur organisashon pa akohida di mucha na Hulanda Karibense a tuma parti.
Resultadonan di e investigashon
EBA ta konkluí ku e diferensia di kosto entre organisashonnan ta grandi i ku e entrada prosedente di supsidio i kontribushon di mayor no tabata sufisiente pa hopi organisashon pa por a kubri gastunan. Motibu pa diferensia entre organisashonnan hopi biaha ta e diferensia den e kantidat di mucha ku ta duna akohida pa kada profeshonal, kostonan di salario, i e kantidat di empleado èkstra ku ta den servisio pa por ehèmpel kushiná, limpia, transporte, i trabounan chikitu. Riba tereno di alohamentu i material tin relativamente tiki diferensia di kosto entre e organisashonnan.
A base di nan análisis, e investigadónan ta konsehá un sistema ku mas tantu posibel ta basá riba kriterio (di kalidat) ophetivo, manera e kantidat di mucha preskribí pa kada profeshonal i e eksigensianan di formashon. Nan ta proponé un kompensashon pa kada parti di dia. E kompensashon aki ta konsistí di sumanan separá pa kosto di personal, di alohamentu, i sobrá kosto.
Pa por kalkulá e altura eksakto di e futuro kompensashon pa akohida di mucha, segun e investigadónan ainda mester tuma algun desishon. Por ehèmpel, ku kua kondishonnan laboral mester tene kuenta en espera di un CAO Akohida di mucha, i si mester apliká un faktor di oumento pasobra kisas e grado di okupashon no semper ta 100%.
Kon ta sigui
A base di e investigashon, Ministerio di SZW den kolaborashon ku e Entidatnan Públiko ta bini ku un proposishon pa e sistema na fin di e aña aki. Lo diskutí e proposishon aki ku organisashonnan pa akohida di mucha i mayornan durante seshonnan di konsulta na e tres islanan. Despues lo presentá e proposishon na Minister pa tuma un desishon.
E espektativa ta ku lo por tuma un desishon definitivo tokante e sistema i e altura di kompensashon pa akohida di mucha struktural (inklusive kontribushon di mayor) den hèrfst di aña 2024, ora tambe a trata e Proposishon di Lei Akohida di mucha BES den Tweede i Eerste Kamer.
Mientrastantu, e areglo di supsidio temporal pa organisashonnan pa akohida di mucha lo sigui na vigor. E intenshon ta pa adaptá e sumanan di supsidio aktual entrante promé di yanüari 2024. E kontribushon di mayor máksimo ta keda meskos.
