Minister Carola Schouten ku Glenn Thodé na Hulanda Karibense
Di 22 pa 27 di òktober Minister Carola Schouten di Maneho di Pobresa, Partisipashon i Penshun, huntu ku Glenn Thodé, presidente di e Komishon Mínimo Sosial di Hulanda Karibense lo ta na Saba, Sint Eustatius i Boneiru. Nan ta papia ku e partidonan enbolbí tokante e rapòrt ‘Un eksistensia digno’ i tokante e siguimentu di e rekomendashonnan di e rapòrt.
E grupo di bishita ta na Saba i Sint Eustatius di djaluna pa djárason. Nan ta papia na ámbos isla ku Kolegio Ehekutivo i Konseho Insular i ta tene kòmbersashonnan di mesa rondó ku interesadonan tokante e rapòrt Mínimo Sosial Hulanda Karibense. Tambe lo tin deliberashonnan ku Saba Business Association i Diálogo Sentral Sint Eustatius tokante e rekomendashonnan den e rapòrt.
Despues di un bishita di trabou na Sint Eustatius djárason, lo tin kòmbersashonnan preparatorio online ku vários miembro di Diálogo Sentral Boneiru. Despues e grupo di bishita ta biaha pa Boneiru, kaminda nan ta yega djaweps 26 di òktober. Alexandra van Huffelen, Sekretario di Estado pa Relashon di Reino i Digitalisashon, tambe lo partisipá.
Na Boneiru e Minister, Sekretario di Estado i Presidente di Komishon ta papia ku Kolegio Ehekutivo, Konseho Insular i Diálogo Sentral Boneiru, den kua sindikatonan, dunadó di trabou i otro partnernan sosial ta representá.
Nan ta spera di konkluí e bishita di trabou riba djabièrnè 27 di òktober ku akuerdonan konkreto tokante e salario mínimo i e siguiente pasonan nesesario pa realisá un mínimo sosial na Hulanda Karibense.