Inisio aplikashon pa kompensashon pa artíkulo di skol SZW
E aña aki un bes mas mayor òf tutor di alumno na Hulanda Karibense por bini na remarke pa un kompensashon den gastu di artíkulo di skol manera unifòrm, sapatu i artíkulo pa skibi. Pa yu ku (despues di fakansi grandi benidero) ta bai skol sekundario, mayor- òf tutornan na Boneiru i Sint Eustatius por entregá un petishon na unidat SZW di RCN. Na Saba por hasi esaki serka Entidat Públiko Saba pa mucha ku ta bai skol básiko i skol sekundario.
Boneiru
Kas di famia na Boneiru ku un yu na skol sekundario i ku un entrada te $1.484 nèto pa luna, por bini na remarke pa e sosten aki. Si tin dos yu, e entrada konhunto no por ta mas ku $1.607 nèto pa luna. Ku tres òf mas yu e entrada máksimo no por surpasá $1.731.
Ta posibel pa apliká via di e-mail òf personalmente durante orario di konsulta spesial: riba 19, 20, 21, 26, 27 i 28 di yüni entre 3’or di atardi pa 7’or di anochi. Luna di yüli kompletu lo tin orario di konsulta riba djaluna, djamars i djárason di 1.30’or pa 4.00’or di atardi. E orario di konsulta lo tuma lugá na ofisina di SZW na Playa. Si un mayor òf kuidadó no por pasa na e orario di konsulta i tampoko por apliká digital, por traha un sita via di meil na onderstand@rijksdienstcn.com òf via WhatsApp +599 795 5053.
Sint Eustatius
Na Sint Eustatius e límite di entrada ta $1.736 nèto pa luna pa kas di famia ku un yu na skol sekundario. Aki tambe ta konta ku si tin mas yu, por apliká si e entrada ta mas haltu. Na Sint Eustatius mayor i kuidadó por entregá un aplikashon na e ofisina di SZW di djaluna te ku djaweps durante oranan di mainta.
Saba
Na Saba, entrante promé di yüni 2023, por akudí na Entidat Públiko Saba pa petishon di kompensashon pa artíkulo di skol i unifòrm di skol pa mucha di tantu skol básiko komo skol sekundario. Wak pa mas informashon riba: www.sabagov.com.
Dokumentonan rekerí
Por haña e formulario di aplikashon riba www.rijksdienstcn.com bou di ‘Asuntunan Sosial’. Banda di esaki, e petishonarionan mester añadí un (kopia di un) sédula bálido (tambe di e mucha(nan)), slep di salario i estado di kuenta di banko di último tres luna. Mester entregá e dokumentonan aki tambe di pareha di e petishonario si e ta forma parti di e mesun kas di famia. Ademas mester proba ku e yu ta bai skol sekundario dor di entregá prueba di inskripshon òf e último rapòrt di skol básiko.Un vògt òf mayor di kriansa mester entregá tambe un desishon ku ta ilustrá ku e ta e kuidadó legal.
Muchanan na skol básiko
Mayornan òf tutornan di mucha ku ta bai skol básiko por tuma kontakto ku e Entidat Públiko di nan isla pa e kondishonnan i dokumentonan nesesario. Na Saba esaki ta konta pa enseñansa básiko i pa enseñansa sekundario. Pa mas informashon tokante e kampaña di Artíkulo pa skol di 2023, por bishitá www.rijksdienstcn.com.