Mischa Prinsenberg hefe nobo di e unidat SZW di RCN
Entrante promé di yüli 2023 Mischa Prinsenberg ta start komo hefe di servisio di e unidat Sociale Zaken en Werkgelegenheid (SZW, Asuntunan Sosial i Empleo) di RCN. E lo sigui mehorá e servisio sosial di e unidat i lo representá e nesesidatnan di e habitantenan di Hulanda Karibense den e área aki na Den Haag. Esaki e ministerio di Asuntunan Sosial i Empleo a anunsiá.
Representá nesesidat di abitante por solamente dor di hiba kombersashon kun’é. Ta p’esei Mischa lo usa parti importante di su tempu na bishitá aktivamente i mantené kontakto ku e abitantenan i partidonan enbolbí. Ademas huntu ku e empleadonan di e unidat SZW di RCN i partnernan lokal, e lo traha na bon servisio i un implementashon transigente di medidanan eksistente i e nobonan di SZW.
Mischa Prinsenberg:
“E último sinku aña mi a biba na Hulanda Karibense. Den e periodo ei mi por a sera konosí ku hopi diferente hende tantu pa trabou komo privá i a tende nan historianan. Tokante logronan di éksito, pero sigur tambe tokante konosé pobresa. Eksperensiá esaki di serka, ta fortalesé mi pa por pasa esaki over na e polítika na Den Haag i konhuntamente traha na trabounan sigur i saludabel i un mihó eksistensia pa tur hende.”
Eksperensia lokal i di Den Haag
Di 2017 te ku yüni 2022 Mischa a biba i traha na Boneiru. E tabata traha komo mènedjer di programa ‘versterking arbeidsbemiddeling’ (fortifikashon di mediashon pa trabou) i komo lider di proyekto Sociaal Domein (Tereno Sosial) di Entidat Públiko Boneiru (OLB). Den e periodo aki el a lanta Plenchi di Trabou i Sentro Akseso den kolaborashon ku e ministerionan di Asuntunan Sosial i Empleo (SZW), Asuntunan Interno i Relashon den Reino (BZK) i Salubridat Públiko, Bienestar i Deporte (VWS). Di yüni 2021 te yüni 2022 e tabata responsabel pa e direkshon diario di Sentro Akseso komo direktor interino.
For di 1 di febrüari 2023 Mischa a kuminsá ku un programa di training na e ministerio di Asuntunan Sosial i Empleo na Den Haag pa prepará su mes pa su funshon nobo. Entrante promé di yüli 2023 e ta tuma e batuta for di Eric Brakke, kende for di yüli 2018 tabata na kabes di e unidat SZW di RCN.