Kambio di petishon di pèrdida di salario pa dunadónan di trabou
Entrante 8 di yanüari e proseso pa mèldu via MijnCN.nl ku un kolaboradó ta falta trabou pa motibu di malesa, embaraso òf un aksidente, a kambia pa dunadónan di trabou. For di awor e proseso di hasi petishon ta mas efisiente i pago lo tuma lugá via e Belastingdienst CN.
Na momentu ku ta mèldu un kolaboradó malu pa promé biaha òf si ta mèldu un kambio di salario di un empleado ku ya ta konosí, e ora ei mesora e dunadó di trabou mester inkluí e slep di salario mas resien den e portal di SZW riba MijnCN.nl. E ora ei por atendé e petishon pa pèrdida di salario rápido i korektamente. Tambe ku esaki e unidat SZW di RCN por prueba e legalidat di e kompensashonnan ku a duna serka e instansianan ku ta kontrolá.
Dunadó di trabou no tin nodi di yena dato di nobo di empleado ku bo a mèldu komo enfermo un biaha kaba. Tur dato ya konosí ta yená outomátikamente. Sí ta keda importante pa e dunadó di trabou kontrolá e datonan di kolaboradónan (malu). Spesialmente e number di telefòn aktual ta importante, pa asina e dòkter di seguro por tuma kontakto ku e kolaboradó.
For di awor ta paga e kompensashon pa pèrdida di salario ku dunadónan di trabou ta risibí den kaso di enfermedat, embaraso òf un aksidente di trabou, via e sistema di pago di Belastingdienst Caribisch Nederland. E pèrdida di suèldu ku ta paga, no ta deskontá ku eventual debe di impuesto ku tin ainda. Pa pregunta tokante pago dunadónan di trabou por akudí normalmente na e Unidat SZW di RCN.