Informashon tokante petishon pa pèrmit di trabou

Obligashon di esfuerso

Ta e intenshon ku bo ta buska personal lokal aktivamente. Bo ta hasi esaki dor di pone aviso den un mínimo di dos diferente medio. (Pues por ehèmpel un biaha via di radio i un biaha riba Facebook, òf un biaha den korant i un biaha via di uitzendbureau, pero no dos biaha via Facebook òf 2 biaha den mes un korant.) Pues bo mester buska ampliamente.

E notifikashon di e vakatura serka Plenchi di Trabou (Boneiru) òf na e Unidat di Labor di e Entidat Públiko lokal (Saba i Sint Eustatius), no ta kai bou di bo propio obligashon di esfuerso.

Bo mester publiká bo anunsionan òf tekstonan di vakatura mínimo sinku siman i duna e kandidatonan sufisiente tempu pa reakshoná.

Eksepshon

Na sierto trabou spesífiko ta kla for di na un prinsipio ku no tin personal riba merkado laboral lokal. Pa e motibu ei pa e siguiente profeshonnan bo mes no mester buska kandidatonan lokal aktivamente.

Boneiru

1. Pintor di vehíkulo
2. Mekániko
3. Trahadó na garashi
4. Tékniko di outo
5. Karpinté
6. Mètslá
7. Prosesadó di metal
8. Tékniko di frishidèr
9. Elèktrishèn
10. Tékniko di elektrisidat
11. Instruktor di buseo
12. Médiko i spesialista médiko
13. Diseñadó gráfiko
14. Dosente
15. Kontroladó di tráfiko aéreo i funshonnan relashoná ku esaki
16. Panadero (pastelero)
17. Kòki independiente òf spesialisá
18. Pelukero

Saba

1. Dosente
2. Instruktor di buseo i master di sambuyá
3. Shèfkòk diplomá
4. Médiko i personal médiko ku edukashon akadémiko
5. Funshonnan ku un salario anual di mas di USD 50.000,-.

PRESTA ATENSHON: Tambe ora ta trata di funshonnan ariba menshoná, bo mester mèldu bo vakatura na Plenchi di Trabou (Boneiru) òf na e Unidat di Labor di e Entidat Públiko (Saba). Si akaso nan determiná ku tòg tin un personal lokal, por disidí di rechasá bo petishon pa pèrmit di trabou.

*Pa protehá kontinuidat di enseñansa a eliminá funshon di dosente na Saba kompletamente di e deber di pidi un pèrmit di trabou. Esaki ta nifiká ku abo komo dunadó di trabou no mester pidi un pèrmit di trabou mas pa un estranhero ku ta duna lès. Un pèrmit di estadia si ta keda un eksigensia.

Klek riba e link pa mas informashon tokante e eksigensianan na Boneiru i Saba.

Hasi petishon pa pèrmit di trabou

No a logra haña trahadónan lokal apesar di bo eventual esfuersonan obligatorio ku a wòrdu hasí? E ora ei bo por entregá un petishon pa un pèrmit di trabou.

Bo por ‘download’ e formulario di petishon aki. Bo mester yena esaki kompletamente i firm’é i agregá tur e pruebanan, manera menshoná riba e checklist. Bo mester entregá e formulario di petishon ku tur e pruebanan na e lokèt di IND-CN di e isla kaminda bo ke hasi bo petishon.Pa mas informashon tokante informashon di kontakto i orario di apertura di tur ofisina di IND, wak riba e página di kontakto di unidat di IND, CN.

Por solamente duna un pèrmit di trabou na un empleado estranhero ku tin un pèrmit di estadia bálido òf ku a hasi un petishon pa esaki. Komo doño di trabou, bo por regla e petishon pa un pèrmit di estadia, na e mesun lokèt. E IND ta manda e petishon pa pèrmit di trabou huntu ku e pruebanan pa e Unidat di RCN di SZW ku ta trata e petishon riba kontenido.

Evaluashon di e petishon

E petishon pa pèrmit di trabou ta wòrdu investigá minusiosamente. Durante e evaluashon ta paga tinu riba e siguiente puntonan:

• E formulario di petishon ta kompletamente yená i tur pruebanan ta agregá? Si esaki no ta e kaso, nos no por evaluá bo petishon i esaki ta wòrdu poné fuera di tratamentu. Bo lo risibí un disposishon tokante esaki.
• E vakatura a wòrdu di mèldu serka Plenchi di Trabou (Boneiru) òf e Entidat Públiko (Saba i Sint Eustatius)? Kiko tabata e konklushonnan?
• Bo a indiká klaramente den bo notifikashon di e vakatura i e anunsionan kiko e funshon ta enserá i kiko e eksigensianan ta?
• Un diploma (spesífiko) ta rekerí pa kumpli ku e vakatura? Si esaki ta e kaso; e eksigensia di diploma ta hustu mirando e vakatura?
• Ta nesesario pa kumplimentu ku e vakatura ku e kandidato tin eksperensia di trabou i/òf ta dominá sierto idiomanan? Si esaki ta ekaso; e eksigensianan aki ta hustu mirando e vakatura? 
• E salario ku bo ta ofresé ta minimalmente e salario mínimo i ‘konforme merkado’? (Esei ta nifiká ku e salario ta konforme loke ta usual pa e funshon i kualifikashonnan nesesario).
• E empleado estranhero ku a wòrdu proponé, tin e kualifikashonnan pidí? (por ehèmpel diploma, eksperensia di trabou i konosementu di idiomanan.)
• Bo a traha un kontrato di trabou den kua lo siguiente ta stipulá: nòmber, direkshon i lugá di establesimentu di e doño di trabou; e nòmber di e funshon; e datonan personal di e estranhero; e salario bruto ofresé pa luna; e kantidat di ora di trabou pa siman; e durashon di e kontrato; i e firma di e doño di trabou?
• E salario manera menshoná den e petishon ta kuadra ku e salario manera menshoná den e kontrato di trabou?
• E trahadó pa ken e pèrmit di trabou ta wòrdu pidí tin un mínimo di 18 aña di edat i un máksimo di45 aña di edat riba e dia di entrega di e promé petishon?
• Bo ta ofresé e estranhero pa ken bo ta pidí pèrmit di trabou bon bibienda?
• Bo a wòrdu otorgá un pèrmit di trabou anteriormente? E ora ei ta wòrdu evaluá tambe, si bo a tene bo mes na e preskripshonnan i limitashonnan mará na e pèrmit di trabou.