30 ekipo di respirashon, medisina i material di protekshon pa kuido di pashèntnan di Corona vírùs pa Aruba, Boneiru i Kòrsou
Awe mainta a sali un buelo di KLM pa Kòrsou ku un kantidat grandi di karga di ekipo médiko, medisina i material di protekshon pa e tres Islanan Abou: Aruba, Boneiru i Kòrsou. Ku esaki por realisá 30 espasio di respirashon adishonal pa Kuido Intensivo (KI) di pashèntnan di COVID-19. Ta trata di 12 espasio na Aruba, 12 espasio na Kòrsou i 6 espasio na Boneiru.
E espasionan adishonal pa KI ta intenshoná pa pashèntnan di tur isla di e parti Karibense di Reino. Si ta nesesario i ta epidemiológikamente responsabel por transportá pashèntnan ku èkstra ‘Air ambulans’ entre e islanan. Hulanda ta duna sosten na kuido médiko riba e tres islanan Karibense den Reino (Aruba, Kòrsou i Sint Maarten) i e islanan di Hulanda Karibense (Boneiru, Sint Eustatius i Saba) pa amplia e kapasidat médiko pa kuido di COVID-19 mas pronto posibel.
Resultado bisto pa tur habitante di e islanan
Sekretario di Estado Paul Blokhuis (VWS): “Ámbos parti di oséano a traha masha duru mes pa logra pone tur kos riba avion. Ku esaki e hòspitalnan lokal no solamente por logra traha 30 espasio tékniko di respirashon na KI pero tambe por duna e kuido ku ta nesesario ku medisina i medionan di protekshon. Mi kolega mandatarionan den e parti Karibense, mi kolega Raymond Knops di Relashon den Reino i ami ta traha huntu mas intensivo ku nunka. Awe nos por mira un resultado bisto den kua a ofresé yudansa konkreto na tur habitante di e islanan. Naturalmente nos ta sigui traha huntu duru pa tur otro kos ku ta nesesario i ku ta realisabel.”
Personal médiko adishonal
Pa reforsá e kapasidat médiko tin nesesidat di personal médiko adishonal. Pa esaki tambe a traha palabrashonnan pa Aruba, Boneiru i Kòrsou ku un kompania internashonal ku ta transportá personal médiko. E promé tim di personal médiko i enfermeronan ku di e forma aki a pone disponibel a kuminsá ku e trabounan e siman aki na Sint Maarten. Djadumingu último a yega Sint Maarten un transporte médiko for di Hulanda ku medisina, material di protekshon i ekipo pa 12 espasio di respirashon adishonal pa KI. Miéntras tantu ya kaba a instalá e espasionan aki.
Djasabra awor lo transportá sobrá espasio adishonal pa KI pa Aruba i Boneiru.