Eksepshon riba kondishonnan di areglo di emergensia SZW
For di djamars último por apliká pa un areglo di emergensia en konekshon ku e vírùs di corona, na unidat di Asuntunan Sosial i Labor (SZW) di RCN. Ta trata di un areglo ku ta yuda dunadó di trabou pa tene empleado den servisio. Empleado i empresarionan independiente ku no tin entrada mas, tambe por kleim e areglo di emergensia aki. SZW ya a risibí hopi aplikashon.
Un opstákulo pa hopi dunadó di trabou ta ku e empleadonan no por traha durante e oranan ku nan ta kai bou di e areglo. P’esei unidat SZW, den konsulta ku su ministerio, a disidí pa hasi eksepshon posibel pa e punto aki. Dunadónan di trabou por entregá un petishon na unidat SZW den kua nan ta splika pakiko ta nesesario pa sigui traha miéntras ku e kompania ta será. Mester trata aki di aktividatnan ku ta nesesario pa despues di e krísis por kontinuá ku e empresa su aktividatnan komersial.
Por apliká e eksepshon por ehèmpel den kaso di un hotèl ku ya no tin huéspet. Vigilansia, limpiesa esensial òf mantenementu básiko ku no por posponé, por sigui miéntras ta hasi uso di e areglo. No ta konsiderá trabou di mantenshon ku por hasi despues, komo trabou nesesario. E dunadónan di trabou ku ke kleim e eksepshon aki, por agregá un aplikashon pa esaki, banda di nan solisitut p’e areglo, splikando e situashon. SZW ta evaluá e petishonnan riba rasonabilidat.
Un otro eksepshon riba e regulashon ta pa empresarionan independiente. Un kondishon pa nan por bini na remarke ta ku nan mester tabata inskribí na un Kámara di Komèrsio na Hulanda Karibense riba 13 di mart, 2020. Den kasonan eksepshonal ta posibel tambe pa kualifiká sin ta registrá na Kámara di Komèrsio. Esei por ta e kaso, por ehèmpel, pa taksista òf piskadó. Mester ta establesé si ku nan ta un empresario independiente. Pa e motibu ei SZW lo chek na Belastingdienst si e empresarionan aki ta konosí serka nan.
Mas informashon tokante e areglo di emergensia i e formularionan di aplikashon ta disponibel riba www.rijksdienstcn.com/covid-19. Por manda e formularionan yená i firmá huntu ku e aneksonan rekerí pa noodregelingSZW@RijksdienstCN.com. Empresarionan na Boneiru por tuma kontakto ku Kámara di Komèrsio via steunloket@KvKbonaire.com pa ayudo ku nan aplikashon. Personanan (individual) ku mester di sosten por tuma kontakto via di telefòn ku unidat SZW (Boneiru: +599 781 5555 òf 781 5556, Saba: +599 416 5652, Sint Eustatius: +599 319 -5693). En konekshon ku distansiamentu sosial, por fabor manda e aplikashon digitalmente kaminda ta posibel.